Osymen ekinshi márte Barqytbeldiń baýraıynda shymyldyǵy túrilip otyrǵan halyqaralyq aıtystyń ashylý saltanatynda sóz alǵan Tarbaǵataı aýdanynyń ákimi Dildábek Orazbaev dúldúl aqyndardyń basyn qosqan sóz saıysynyń Elbasynyń «Rýhanı jańǵyrý: bolashaqqa baǵdar» maqalasynda kórsetilgen mindetterdi júzege asyrý aıasynda uıymdastyrylǵanyn, bul sharany osy óńirdiń týmalary Tastekeevter áýletiniń qarjylandyrǵanyn atap ótti. Ádettegideı Júrsin Erman tizginin ustaǵan, belgili qalamger Erkin Jappasuly, ǵalym Nádirbek Ápsálemuly, aıtyskerler Serik Qalıev, Dáýletkereı Kápuly, telejúrgizýshi Berik Ýálı qazylyq etken jyr dodasynda aıtyskerler týǵan jer, ósken el, ulttyq dástúrlerimizdi ulyqtaý, ótkenimizdi umytpaý syndy ózekti taqyryptardy jan-jaqty qaýzap, kórermenniń ystyq yqylasyna bólendi.
Alaman aıtysty shyraıly Shymkentten kelgen Qalıjan Bildáshev pen almatylyq Shuǵaıyp Sezimhan bastady. Ekinshi jup bolyp sahnaǵa Jaıyqtyń qyzy Jansaıa Mýsına men О́kpetiniń óreni Rústem Qaıyrtaıuly shyqqanda bes myń kórermen ornynan turyp qol soqty. Qos aqyn da jankúıer kútken senim údesinen shyǵyp, qyz ben jigit aıtysynyń ádemi úlgisin kórsete bildi. Tús aýa sahna tórine Alashtyń azýly aqyny Rınat Zaıytov pen sońǵy jyldary aıtysta júlde bermeı, júıriktigimen tanylyp júrgen Kerekýdiń dúldúli Aspanbek Shuǵataev shyǵyp, búgingi qoǵam, zaman jaıyndaǵy oılaryn ortaǵa saldy. Uzyn sany 12 aqyn qatysqan óner básekesinde Aqsýattyń týmasy Rústem Qaıyrtaıuly babynda ekenin baıqatyp, bas júldeni (2 mln teńge) qanjyǵaǵa baılady. Birinshi oryndy Rınat Zaıytov (1 mln teńge), ekinshi oryndy Jansaıa Mýsına (750 000 teńge), úshinshi oryndy Qytaıdan kelgen qandasymyz Jarqynbek Berdibekuly (500 000 teńge) enshiledi. Muhtar Nııazov jáne Aspanbek Shuǵataev 300 000 teńgeniń arnaıy syılyǵyna ıe boldy.
Shara sońynda tól ónerimizdiń janashyry Júrsin Ermanmen tildeskenimizde, sońǵy jyldary aıtysty Almaty men Astanada ǵana emes, shalǵaı aýyldarda jıi ótkizip júrgendikterin, bul Elbasynyń tapsyrmasy ekendigin aıtty. «Bıylǵy Aqsýattaǵy aıtys byltyrǵydan ózgeshe boldy. Aıtystyń demeýshisi Dýlat Tastekeev baýyrymyzdyń aıtýynsha, bul aıtys jyl saıyn dástúrli túrde ótedi. Bıyl shetten eki aqyn qosyldy jáne jyl saıyn qıyrda júrgen talantty aqyndardy osyndaı dodalarǵa shaqyratyn bolamyz. Erekshelik dep otyrǵanym, demeýshimiz jyl saıyn «Kórermen kózaıymy» degen arnaıy stıpendııa taǵaıyndap jáne sol aqyn keler jylǵa deıin aı saıyn 200 myń teńge turaqty stıpendııa alyp otyratyn bolady. Bul, eń aldymen, tól ónerimizge degen úlken qurmet bolsa, ózge óńirlerge úlgi bolarlyq jaıt», deıdi J.Erman.
Azamat QASYM,
«Egemen Qazaqstan»
Shyǵys Qazaqstan oblysy,
Tarbaǵataı aýdany
