Sınhaı provınsııasy Kýnlýn shyńynda ornalasqan. Aýdany 720 sharshy shaqyrymǵa sozylǵan aımaq tabıǵı baılyǵymen jáne tamasha mádenıetimen tanymal. «Sońǵy on jyl ishinde Sınhaı resýrstardy ıgerý esebinen erekshe salalardy damytýda. Jalpy, ulttyq ónimniń úzdiksiz ósý qarqyny 10 paıyzdan asady. Ekonomıkalyq qýattylyǵy, hımııa ónerkásibi edáýir ósken, bul munaı jáne tabıǵı gaz, taýlarda ósetin ósimdik sharýashylyǵy, mal sharýashylyǵy jáne basqa da salalardyń ilgerilegenin ańǵartady.
Qytaı jáne tıbet dárileri, ulttyq kıim men áshekeıler, sondaı-aq, óńdeý ónerkásibi jaqsy damýda. Gıdroenergetıka, jel energetıkasy, gaz gıdrattary jáne basqa da ekologııalyq taza energııa resýrstaryn ıgerý jáne paıdalaný aıryqsha qarqynmen alǵa jyljýda», deıdi «XiNing Moonlight PV Technology» kompanııasynyń bas dırektory Hao Iong. Ol álemdik naryqta jetekshi oryn alatyn kún panelderin jetkizý boıynsha Qazaqstanmen áriptestikti retteý maqsatynda kelgenin de jasyrmady.
«Biz Astanadaǵy EKSPO-2017 kórmesinde ótip jatqan Sınhaı provınsııasynyń aptasyna qatysyp, Qazaqstannyń naryǵyn zerttep, zerdeleýdi maqsat ettik. Kún panelderin shyǵarýmen aınalysatyn kompanııamyz mundaǵy áriptestermen jumys jasaýǵa daıyn. Qazaqstan – biz úshin óte úlken naryq. О́nimderimiz ınnovasııalyq tehnologııalarmen jáne baǵasymen erekshelenedi. Olardyń árbir bólshekteri tolyq pysyqtalyp, Sınhaı provınsııasynda da, jalpy Qytaıda da belsendi satylýda. Biz Afrıka, Irak, Pákistan sııaqty eldermen jumys jasaımyz. Endi «Bir beldeý, bir jol» baǵdarlamasy men EKSPO kórmesiniń arqasynda Qazaqstan naryǵyna da shyǵatynymyzǵa senemiz», dedi bas dırektor.
Ashat Raıqul,
"Egemen Qazaqstan"
