Saltanatty jıynnyń resmı bóliminde Ádilet mınıstriniń orynbasary Elvıra Ázimova sóz sóılep, EKSPO-2017 kórmesin ótkizýge Astananyń úmitkerligin qoldaǵany úshin Gambııaǵa rızashylyǵyn bildirdi. «Qazaq eli TMD men Ortalyq Azııa memleketteri arasynda dúnıejúzilik aýqymdaǵy osyndaı mańyzdy is-sharany birinshi bolyp ótkizip otyr. Osy kórmede «Bolashaq energııasyna» arnalǵan álemniń úzdik ǵylymı jáne ınjenerlik jetistikteri qoıylǵan», – dedi ol.
Vıse-mınıstr eki eldi ıslam yntymaqtastyǵy aıasyndaǵy dostyq qarym-qatynas baılanystyratynyn aıtty. Onyń sózinshe, tamyz aıynda kórme alańynda ǵylym men tehnologııany damytýǵa baǵyttalǵan birinshi sammıt ótpek. Bolashaqta EKSPO qurylysy naqty jobalar túrinde jańa ataýǵa ıe bolady. Gambııanyń saýda ónerkásip, aımaqtyq birigý jáne jumyspen qamtý mınıstri doktor Aısatý Týel Qazaqstanǵa qonaqjaılylyǵy úshin alǵys aıtyp, bolashaqtaǵy nátıjeli yntymaqtastyqqa múddeli ekenin jetkizdi. «Bizdiń respýblıkamyzdan kelgen resmı delegasııa men óner qaıratkerlerine kórsetilgen qonaqjaılylyqty joǵary baǵalaımyz. Men sizderge joǵary mártebeli Gambııa prezıdenti Adam Barroýdyń sálemin jetkizemin. Bizge munda óz úıimizdegideı qamqorlyq jasalýda. Bul syılastyqtaryńyz bizdiń júregimizde máńgi izin qaldyrady», degen sheteldik mınıstr qazaqstandyqtarǵa saýda jáne ınvestısııalyq usynystaryn tanystyrýǵa ázir ekenin jetkizdi. Jańa Gambııa energetıka boıynsha «jol kartasyn» aıaqtaǵan eken. Al ol ınvestorlardy jyly jaǵajaıǵa tartýǵa septesetin kórinedi.
«Astanada ótip jatqan EKSPO-2017 halyqaralyq kórmesine kúlli álem kóz tigýde. Sebebi, dál osynda balamaly qýat kózderine qatysty ozyq tehnologııalar usynylyp, kóptiń kókeıinde júrgen saýaldarǵa jaýap alýǵa bolady. Biz Qazaqstanmen ári qaraı da baılanysymyzdy bekemdep, kórmedegi biregeı bastamalardy el ıgiligine qoldanýdy kózdeımiz», dep túıindedi sózin Aısatý Týel.
Resmı bólimnen keıin ulttyq sahnada Gambııadan kelgen ártister óner kórsetti. Ásirese, «Polo Djýbý Beng» tobynyń án-jyry qonaqtardy tánti etti.
Ashat Raıqul,
"Egemen Qazaqstan"
