Vıse-mınıstr QR UEM Ult jospary aıasynda «Indýstrııalandyrý jáne ekonomıkalyq ósim» baǵyty boıynsha tórt qadamdy iske asyrýǵa jaýapty ekenin aıtty. Onyń úsheýi salyq pen keden saıasatyna jáne bireýi monopolııaǵa qarsy jumyspen baılanysty.
Salyq tólemderi Qazaqstan Respýblıkasynyń memlekettik kiristeriniń shamamen 64%-yn quraıdy. Salyq jáne keden saıasatyn ońtaılandyrý - sapaly ekonomıkalyq ósim men elimizdiń ınvestısııalyq tartymdylyǵyn arttyrýdyń mańyzdy quraýyshy.
Ult jospary aıasynda atalǵan baǵyt boıynsha qoldanystaǵy salyq rejımderin ońtaılandyrý jumystary júrgizilip jatyr - Salyq jáne Keden kodeksteriniń jańa jobalary ázirlendi. Salyq turǵysynan memleket tarapynan bıznesti ákimshiliktendirýdi jeńildetý, nesıeleýdi yntalandyrý, sondaı-aq geologııalyq barlaý jumystaryna ınvestısııalar salý kózdelgen. Sonymen qatar, salyq konsýltanttary ınstıtýtyn, dıstansııalyq aýdıt jáne salyq nesıelerin engizý josparda bar.
«Kodeks jobasyn ázirleý jumysy aıaqtaldy, biz ony osy aıda Parlamentke usynýdy josparlap, 2018 jyldan bastap qoldanysqa engiziledi dep kózdep otyrmyz», - dedi R. Dálenov.
Keden baqylaýy týraly aıtar bolsaq, munda deklarasııalaý kezinde elektrondy tehnologııalardy engizýge, kedendik operasııalardy oryndaý kezinde avtomatty aqparattyq júıelerdi qoldanýǵa jáne baqylaýdan ótý barysynda «biryńǵaı tereze» tetikterin belsendi paıdalanýǵa basymdyq beriledi.
