(Sýret ontustik.gov.kz saıtynan alyndy)
Osydan bir apta buryn Ońtústik Qazaqstan oblysynda Eńbek jáne halyqty áleýmettik qorǵaý mınıstrliginiń kúnderi bastalǵan bolatyn. Al keshe atalmysh sala mınıstri Tamara Dúısenova jumys saparymen kelip aptalyqty qorytyndylady.
Naqtyraq aıtsaq, Tamara Qasymqyzy óńirdegi «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasy men «О́rleý» jobasy syndy mańyzdy baǵdarlamalardyń oryndalý barysyn oń baǵalady. Mınıstr, sondaı-aq, oblys ákimi Janseıit Túımebaevpen mindetti áleýmettik medısınalyq saqtandyrý júıesin halyqqa túsindirý jumystaryn odan ári jandandyrý jaıyn talqylap, ońdy nátıjelerge jetýdiń joldaryn usyndy. Áleýmettik salalar aıasynda atqarylyp jatqan jumystar boıynsha qaladaǵy birneshe nysandardy aralaǵan mınıstr men ákim aldymen, «О́rleý» jobasyna qatysýshy shymkenttik turǵyn Aınur Jamanqulovamen kezdesip, tigin sehynyń jumysymen tanysty. Kásipker joba ıgiligin paıdalanyp, 500 myń teńgege jýyq qarjy alǵan. Búginde óz úıinen shaǵyn tigin sehyn ashyp, áıelderge arnalǵan sándi kıimder tigýmen aınalysýda. Aılyq tabysy 150 myń teńgeniń kóleminde. Kásipker aldaǵy ýaqytta «О́rleýdiń» kezekti múmkindikterin tıimdi paıdalanýdy kózdep otyr.
«Standart Sement» zaýytynda bolyp, jumysshylarmen áńgimelesken mınıstr T.Dúısenova memleket tarapynan jasalynyp otyrǵan jeńildikterdi baıandady. Búginde 700-ge jýyq jumysshysy bar «Standart-Sement» zaýyty 2011 jyly qurylǵan. Sement óndirip, ony satýmen aınalysatyn seriktestik jylyna 2 mln. tonna ónim óndiredi. Mundaǵy sement ónimderi Qazaqstannan bólek, О́zbekstan men Tájikstanǵa saýdalanady. О́z kezeginde jumysshylar óndiris ornynda barlyq jaǵdaı jasalyp jatqanyn aıtyp, zaýyt basshylyǵyna alǵystaryn bildirdi.
Mınıstr men ákim bastaǵan top Shymkent qalalyq jumyspen qamtý ortalyǵynda boldy. Bul ortalyq 2011 jyly qurylǵan, al ótken jyldan bastap jańa ǵımaratta halyqqa qyzmet kórsetýde. Qazirgi tańda 60-qa jýyq qyzmetker jumys isteıdi. Tamara Qasymqyzy shahar jurtshylyǵyn jumyspen qamtý salasyna jaýapty jetekshilermen tildesip, jumysty odan ári shıratýdy tapsyrdy. Kezdesýge kelgen qala turǵyndarynyń mınıstrge qoıar saýaldary da az bolmady. Mınıstr olarǵa naqty jaýap berdi.
Oblys ortalyǵyndaǵy birqatar nysandardy aralap, turǵyndarmen tildesken soń, sapar nátıjesi boıynsha oblys ákimdiginde áleýmettik salanyń ózekti máseleleri boıynsha jıyn ótti. Munda nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy aıasynda atqarylǵan jumystar baıandaldy. Sonymen, bıyl Ońtústikte atalǵan baǵdarlama aıasynda 64314 adamdy jumyspen qamtý josparlanyp, jalpy 11,4 mlrd teńge bólingen. Jyl basynan bergi 7 aı ishinde 49,6 myń adam jumyspen qamtylyp, jyldyq jospar 77 paıyzǵa oryndalǵan. Bıyl 1 tamyzǵa deıin 36623 adamǵa jumyspen qamtý sharalary kórsetilipti. Onyń ishinde, 20882 adam turaqty jumyspen qamtylsa, 4494 adam ýaqytsha jumysqa turyp, 5900-deı azamat áleýmettik jumys oryndaryna, 4644 adam jastar tájirıbesine joldanypty.
Jıynda málim etilgen mańyzdy málimettiń biri − oblysta jarty jylda 75 myńǵa jýyq azamat «О́rleý» jobasynyń aıasynda memleket qoldaýyna ıe boldy. Osy ýaqytqa deıin «О́rleý» jobasyna qatysýshylardyń qatarynda 400 birjolǵy shartty aqshalaı kómek alýshy jeke kásipker retinde salyq organdaryna tirkelip úlgergen. Jobany júzege asyrý nátıjesinde shartty aqshalaı kómek alýshylardyń kirisi 3,2 esege ósip, ortasha eseppen jan basyna aıyna 18,7 myń teńgeni mejeledi. Bul oraıda mınıstr Ońtústik óńiriniń áleýeti óte joǵary ekenin aıta kele, keı aýdandar jumysty tómen deńgeıde istep otyrǵanyn nazarǵa saldy. Mımyrt aıańmen kele jatqan aýdandar dereý óz-ózderin qamshylamasa kesh bolatynyn málimdedi.
Ǵalymjan ELShIBAI,
«Egemen Qazaqstan»
