Abaı elindegi jarqyn jańalyqtar

El Táýelsizdiginiń 20 jyldyǵyna oraı jer-jerdiń bárinde atqarylyp jatqan 20 jarqyn is aıasynda Abaı aýdanynda da kóptegen sharalar júzege asyrylýda. Naqtylap aıtsaq, osy merzimde 150-ge jýyq ıgi is qolǵa alynyp, 200 mıllıonnan astam teńgeniń qarjysy ıgerilgen. Aı­talyq, bir ǵana Sarjal aýyldyq okrýginde jal­py quny 36 mıllıonnan astam teńge bo­latyn 17 is júzege asyrylypty. Sonyń qa­tarynda atal­ǵan aýyldyń túlegi, sambodan sport sheberi Berik Qanafın osyndaǵy orta mekteptiń sport zalyn kúrdeli jóndeýden ótkizip qana qoımaı, ony sport qural jabdyq­tarymen qamtamasyz etse, aýylda paıdalanýǵa berilgen 400 oryndyq mádenı demalys orny da osy azamattyń demeýshiligimen qatarǵa qosylǵan eken. Al esimi elge belgili kásipker, oblystyq más­­lıhattyń depýtaty, oblystyń qurmetti aza­maty Ǵabbas Ibraev bolsa aýdan orta­ly­ǵy Qaraýyl aýylyndaǵy Qunanbaı qajy meshitin kúrdeli jóndeý jumysyna 3 mıllıonnan astam teńge bólgen kórinedi. Mundaı ıgi sharadan Kýrchatov qalasyndaǵy «Degeleń­tas» kásipor­ny­nyń basshysy Vladımır Kovalev ta syrt qalmapty. Onyń demeýshiligimen Qaraýyldaǵy ortalyq alańda Astanadaǵy «Han shatyry» ispettes sahna turǵy­zyl­ǵan. Atymtaı jomart atanǵan Vladımır osy sharýaǵa dep 5 mıllıonnan astam qarjy bosatypty. Qaraýyldaǵy taǵy bir jańalyq sol, táýel­sizdik merekesi qarsańynda munda uzaq jyldan beri ıesiz qalǵan «Arman» kıno­teatry «Jastar úıi» bolyp qaıta ashyldy. Endi munda aýdan jastarynyń ónermen shu­ǵyl­danyp, kóńil­di demalýyna barynsha jaǵdaı jasalǵan. Mundaı jaqsy jańalyqtar aqyn Kókbaı aýylynan da kóptep estile bastady. Aıtalyq, biz­diń tilshi qosynymen jıi habarlasyp tura­tyn gazet janashyry, aýdannyń ishki saıasat bóliminiń meńgerýshisi Jaqsylyq Ekibaev osy aýylda táýligine 20-25 iri qara men 200 usaq mal soıatyn arnaıy muzdatqysh kameramen jabdyqtalǵan mal soıý alańy iske qosylǵanyn aıtsa, endi Taqyr eldi mekenindegi aqyn Kókbaıdyń kesenesi men murajaıyna quny 5 mılllıon teńgeniń kúrdeli jóndeý jumystary júrgizilgenin habarlaǵan. Ol, son­daı-aq bul ıgi sharýaǵa aýdannyń qurmetti azamat­tary Saılaý Koshkın, Amantaı Muqataev jáne Semeıde turatyn belgili kásipker Tóleýǵazy Imanǵalıev demeýshilik jasaǵanyn aıta ketýdi de umytpaǵan. Dáýlet SEISENULY.      Shyǵys Qazaqstan oblysy.