Kópten beri paıdalanylmaı kele jatqan saýyqtyrý ortalyǵynyń irgetasy 1975 jyly qalanypty. Bir kezderi balalar ýlap-shýlap jatatyn lagerdiń qazirgi kórinisi usqynsyzdaý, ábden tozǵany kórinip tur. Biraq kúzetshi qoıylǵandyqtan bundaǵy ǵımarattar buzylmaǵan, sol qalpynda. О́zen jaǵasynda turǵan eki qabatty negizgi ǵımarattyń syrty julym-julymy shyqqanymen, qabyrǵalaryna eshqandaı zaqym kelmepti. Bul korpýstyń jalpy aýmaǵy 496 sharshy metr bolsa, ol avtonomdy jylý júıesimen jylytylady. Endi osy negizgi korpýs, tehnıkalyq pasporttary joq 8 qosalqy ǵımarat jáne kúnnen qaqpalaıtyn oryndar men sheshinetin jerleri bar ortalyq kúrdeli jóndeýden ótedi. Atalǵan nysanǵa tehnıkalyq pasport bar jáne abattandyrýdy qosa alǵanda smetalyq qujat pen memlekettik saraptama ázirleý úshin 11,2 mln teńge de bólinip otyr.
Ortalyq kúrdeli jóndeý kórgen soń 70 balany emin-erkin qabyldaı alady. Sonymen qatar qosymsha ǵımarattarda taǵy 30-40 balany demaldyrýǵa bolady eken. Atalǵan demalys ornyn jyldyń barlyq mezgilinde jumys isteıtindeı jaǵdaıda ustaýǵa múmkindik bar deıdi osy iske jaýapty adamdar. Tipti ortalyq aýmaǵynda jańa ǵımarattar salýǵa da jer jetetin kórinedi. Zerendi aýdandyq bilim berý bóliminiń basshysy Jangel Ýaısov balalardyń barynsha jaqsy demalýlary úshin jaıaý júrý jáne ózende júzý jaǵdaılarynyń barlyǵy jasalatynyn alǵa tartty. Áleýmettik az qamtylǵan jáne kóp balaly otbasylardyń balalaryna tegin demalatyndaı jeńildikter de qarastyrylýy múmkin kórinedi. Sonymen birge memleket qaraýynda bolatyn atalǵan ortalyqta demalý baǵasy jeke lagerde demalýdan artyq bolmaıtyndyǵyna sendirgen sheneýnik aýdanda osyndaı saýyqtyrý orny joqtyǵyn alǵa tartty.
Jalpy, aýdanda «Suńqar», Málik Ǵabdýllın atyndaǵy jáne «Parýs» dep atalatyn jeke menshiktegi úsh lager jumys isteıdi. Qazirgi kezde sol Málik Ǵabdýllın atyndaǵy lagerde 100-ge tarta bala óz jazǵy demalystaryn ótkizipti. Eger «Iskorka» jańa ataýymen jáne ózgeshe qyzmet kórsetý sapasymen qatarǵa qosylatyn bolsa, onda aınalasyndaǵy ózge de lagerler óz qyzmet sapalaryn barynsha jaqsartýǵa umtylatyny aıtpasa da túsinikti. Sondyqtan da jańa demalys ornynyń qatarǵa qosylýy ońdy ózgerister ákeledi degen úmit te joq emes.
Asqar TURAPBAIULY,
«Egemen Qazaqstan»
Aqmola oblysy
