– Ol óz úıinde sport zalyn ashyp alǵan, sońǵy birneshe jylda aýyl balalary topyrlap jınalyp, jańashyl azamattyń nusqaýymen neshe túrli jattyǵýlar jasaıdy, kúndiz-túni shtanga, gir tastaryn jalyqpaı kóterip, sıqyry mol sporttyń qyr-syryna úırenýde, – degen Aqqaınar aýyldyq okrýginiń bas mamany Serikhan Qurmanovtyń sózinen keıin oılanyp jatpastan Ýálı Nurqasynovtyń úıine tartyp kettik. Myǵym deneli, ózine jarasymdy saqal jibergen Ýákeń bizdi esik aldynan qarsy aldy. Keń dáliz arqyly túpki bólmege engende óz kózimizge senbedik, dene jattyǵýlaryn jasaıtyn týrnık, júgirýge arnalǵan arnaıy jabdyq 32, 24,16 puttyq gir tastary, otyryp, túregelip turyp jattyǵýlar jasaıtyn quraldar qaz-qatar tizilip tur. Adam denesiniń symbatty bolýyna, bulshyq etteriniń bult-bult oınap, kúshti bolýyna yqpal jasaıtyn neshe túrli jattyǵýlar jaıly jazylǵan maqalalar men jýrnal qıyndylary bir buryshqa ilinipti.
– 67 jyl buryn Aqqaınar aýylynda dúnıege keldim, osyndaǵy orta mektepti bitirgen soń eńbekke aralasyp kettim. Orman sharýashylyǵynda qyzmet etip, 9 jyl boıy omarta ustadym. On shaqty jyl Katonqaraǵaı memlekettik ulttyq parkinde ınspektor bolyp istedim. Eki jyl boldy, zeınetkermin, jubaıym Saılaýgúl uzaq jyl mektepte ustazdyq etti, Baqyt, Saıan degen ul-qyzdarym, úsh nemerem bar, – dep Ýákeń ómir jolyn qysqasha aıtyp berdi.
Budan keıin Ýákeń sportpen bala kezden shuǵyldanǵanyn, azamattyq boryshyn atqaryp júrgen kezde gir tastary men shtanga kóterip, birneshe ret jarystarǵa qatysqanyn aıtty. Tabıǵaty tamyljyǵan taıgada ásker qatarynda bolǵan aqqaınarlyq azamat elge oralǵan soń ózi unatatyn sportty jalǵastyrǵan. Aldymen gir tastaryn satyp alady. 32 kelilik qos girdi esh qınalmastan birneshe ret kóterý sport janashyryna qıyndyq týǵyzbaıdy. Al qysy-jazy úıden shyqpaı júgirýge arnalǵan quraldy sıyryn satyp, sol aqshaǵa satyp alypty.
– Adam aǵzasy 100 jyl, tipti odan da uzaq ómir súrýge shydas beredi. Ol úshin ne isteý kerek? Araq pen shylymdy umytyp, kúnine tańerteń tura sala dene jattyǵýlaryn jasaý, kem degende 5-6 shaqyrym júgirgen adamnyń densaýlyǵy myqty bolyp, uzaq ómir súretini belgili. Men jattyǵýdy kún saıyn jasaımyn, aýa raıy qolaıly kezde dalaǵa shyǵyp júgirsem, kók taıǵaq, jańbyrly kúni úıdegi quralǵa shyǵyp alyp, júgiremin. Aýyl balalary armanshyl ǵoı, bolashaqta Ilıa, Jasulan sııaqty ataqty aýyr atlet bolǵysy keledi. Olar bizdiń úıge kún saıyn keledi, jattyǵý jasaıdy, ol úshin kók tıyn almaımyn. Dalada qańǵyp, araq iship, shylym shekkenshe, sportpen aınalyssa qandaı ǵanıbet. Aqqaınar aýylynan bolashaqta álem chempıondary shyǵyp jatsa, tańǵalmańyzdar, – dep Ýákeń aǵynan jaryldy.
Keýde men aıaqtyń bulshyq etterin jetildiretin jattyǵýǵa arnalǵan, bir orynda turyp salmaǵy birneshe put gir tastaryn joǵary kóteretin snarıadtar, basqa da sport quraldaryn aýyldy qoıyp, sport mektepterinen tabý ońaı emes. Shaǵyn ǵana aýylda turyp jatqan Ýálı Nurqasynovtyń sportty serik etip, aýyl balalaryn tárbıelep jatqany erlikke tán is emes dep kim aıtar?
Ońdasyn ELÝBAI,
jýrnalıst
Shyǵys Qazaqstan oblysy,
Katonqaraǵaı aýdany
Sýretti túsirgen avtor
