Marafonǵa shetelden myń adam keledi

Mádenıet jáne sport mınıstr­ligi men ShYU bastamasymen qolǵa alyn­ǵan jeńil atletıka jarysyn bıyl qurylǵanyna 25 jyl tolatyn Azııadaǵy ózara yqpaldastyq jáne senim sharalary jónindegi keńestiń forýmymen birge ótkizý jos­parlanǵan. Sport jáne dene shy­nyqtyrý isteri komıteti tóra­ǵa­synyń orynbasary Serik Jara­s­baevtyń aıtýynsha, ShYU-nyń birin­shi marafony byltyr Qytaı­dyń Kýnmın qalasynda ótken eken. «Oǵan 15 myń adam qatysqan. Al ekinshi marafon EKSPO-2017 kórmesi aıasynda ótpek. Bul joly uıymdastyrýshylar sharada 5000 adamdy qamtıtyn bolady. Onyń ishinde myń adam shetelden kelmek. Sondaı-aq, ShYU-nyń árbir elinen 30 kásibı sportshy tartý kózdelgen.Tirkeý jumystary arnaıy ashylǵan saıtta 15 shildede bastalyp, júrgizilýde», deıdi ol. 

Baspasóz máslıhatynda marafon­nyń resmı túrde júgirý aımaqtary tanystyryldy. Olar – arnaıy sımvoldyq 2017 metr, bul qashyqtyq EXPO RUN dep atalady; áýesqoılar úshin 10 shaqyrym; tolyq marafon – 42 shaqyrym 195 metr. Jarys jelisi Astananyń sol jaǵalaýyndaǵy basty kóshelerdi qamtıdy. Start EKSPO kórmesiniń avtoturaǵy aımaǵynan, ıaǵnı «Mega SilkWay» saýda ortalyǵy jaǵynan 27 tamyz kúni  bastalady. 42 shaqyrym 195 metrge qatysýshylar saǵat 7:30-da, 10 shaqyrymǵa qatysýshylar 8:00-de, 2017 metrge qatysýshylar 8:30-dan bas­tap júgiredi. 
Úmitkerler marafonnyń resmı «www.scomarathon2017.com» saıty arqyly tirkele alady. Sodan keıin qatysýshylarǵa saıt arqyly tirkeý nómirleri beriledi. Sondaı-aq, resmı saıtta aqparattyq-jarnamalyq materıaldarmen (foto, vıdeo, afısha) jáne tirkeý erejelerimen offlaın túrde tanysýǵa bolady. 

25 jáne 26 tamyz kúnderi EKSPO kórmesiniń ońtústik qaq­pa­sy jaǵynan tirkeýden ótken qat­y­sý­shylarǵa bastapqy paketter beri­ledi. Onda júgirýge arnalǵan jeıde men árbir qatysýshynyń jeke nómiri bar. Paketterdi taratý kezinde tanymal marafonshylardyń qatysýymen sheberlik saǵattary ótedi. Olar áýes­qoı júgirýshilerge marafonǵa qalaı daı­yndalý kerektigin kórsetip, aqyl-keńesterin aıtatyn bolady. 

Qazaqstan Jeńil atletıka fe­de­rasııasynyń vıse-prezıdenti Eldar Tabanovtyń aıtýynsha, 10 sha­qyrymǵa júgiretinder 3000 teńge, 42 shaqyrym 195 metrge júgiretinde 5000 teńge kóleminde jarna tóleýi tıis. Al 2017 metrge júgirý tegin. Sonymen qatar zeınet jasyndaǵy jáne múmkindigi shekteýli jandar tegin qatysa alady. 

Ashat Raıqul,

"Egemen Qazaqstan"