Qazirgi qazaq ádebıetiniń damý barysyn jan-jaqty zerttep-zerdelep júrgen ǵalymdar Elbasy N.Á.Nazarbaevtyń rýhanı jańǵyrýǵa baılanysty kótergen mańyzdy máseleleriniń qazirgi ádebıettegi kórinisi men osy taqyryptyń baspasózde qalaı qoldaý taýyp otyrǵandyǵyn keńinen talqylady. Shyǵarmashylyq ıeleriniń táýelsizdik kezeńindegi týǵan jer, otan, eldik máselelerin kótergen týyndylary, el men jer tarıhynan syr shertetin keıbir úzdik shyǵarmalary atalyp, olardyń kórkemdik-tarıhı mańyzy jaıly keıingi zertteýler barysy týraly baıandamalar tyńdaldy.
Qazirgi ádebıetimizdiń damýyna úles qosyp júrgen qalamgerler sóz alyp, óz qatarlastarynyń keıingi jyldardaǵy oqyrmanǵa usynǵan kórkem shyǵarmalarynyń rýhanı qundylyqtary týraly sóz etti. Osy qatardaǵy jazýshylardyń táýelsizdik kezeńindegi rýhanı ózgeristerdi kórkem shyǵarmada sıpattaý erekshelikteri búgingi kún oqıǵalarymen tyǵyz baılanysyp otyratyndyǵy aıtyldy.
– Ár ýaqytta halqymyzdyń ótken ýaqyttaǵy tarıhy men salt-dástúriniń damyp jańǵyrýy onyń ádebıeti men mádenıetiniń, turmystaǵy ál-aýqatynyń jańǵyrýyna ulasady. Búgingi ekonomıkanyń tetigi bolatyn erteńgi jas urpaqqa laıyqty kórkem shyǵarmalar usynyp, olarǵa burynǵy qundylyqtardy sińirip otyrýdyń Elbasy aıtqan ult josparyn júzege asyrýda mańyzy zor ekeni sózsiz. Elimizdegi rýhanı jańǵyrýdyń ádebıettegi kórinisi turǵysynan búgingi basqosý barysynda biraz oı-pikirler ortaǵa tastaldy. Aqyn-jazýshylarymyz, qolyna qalam ustaǵan azamattarymyz qashanda ult rýhanııatynyń damýyna qomaqty úles qosyp, eldik pen erlikti, tatýlyq pen birlikti dáriptep memleket mártebesin asqaqtatyp júr dep aıta alamyz, – deıdi M. Áýezov murajaı-úıiniń qyzmetkeri Ermek Hankeı.
Sondaı-aq, atalǵan shara jazýshy, ǵalym Kelis Rahymjanovtyń 60 jyldyq mereıtoıyna tuspa-tus keldi. «Oralý», «Qalǵuty», «Qanatty jyldar», «Shıli ózen» sııaqty jınaqtary oqyrman qaýymnyń súıispenshiligine bólengen qarymdy qalamgerdi áriptes tustastary mereıli kúnimen quttyqtady. Ult rýhanııatyna qaltqysyz qyzmet etip júrgen jazýshynyń ǵylym jolyndaǵy tereń izdenisteri jınalǵandar tarapynan joǵary baǵalandy.
Arman OKTIаBR,
«Egemen Qazaqstan»
ALMATY
