Oblystyq mádenıet basqarmasynyń basshysy Nurbolat Ahmetjanov daıyndyq jumystarymen bylaı tanystyrdy: «Halyqaralyq kórmege erekshe bolmysymen qazaq sportynyń darabozy atanǵan Qajymuqan Muńaıtpasovtyń ómirine, balýandyǵy men patrıottyǵyna kýá bolar fotosýretter men tarıhı qysqa metrajdy derekti fılmder, ózi tutynǵan turmystyq zattar men kıgen kıimder jetkiziledi. Sondaı-aq, álemdik saıystardan utyp alǵan 48 altyn-kúmis medaldary jáne sporttyq buıymdary, 74 jasynda uly aqyn Abaı Qunanbaıulynyń 100 jyldyq mereıtoıyna kıip barǵan kóılegi men shalbary, jattyǵý kezinde paıdalanǵan kirtastary halyqaralyq kórme jurtshylyǵy nazaryna usynylady.
Sonymen qatar, júz myńnan asa qundy jádigeri bar Ońtústik mýzeıleri qazynasynda ózindik orny men tarıhy ózgeshe dúnıe sanalatyn Kenesary Qasymulynyń qylyshy da Astana tórinen tabylady. Bul temir qylyshtyń saby – súıekten, qynaby bylǵarydan jasalǵan. Onyń uzyndyǵy – 70, saby – 15, júziniń eni – 3-4 santımetr».
Shymkent qalasyndaǵy oblystyq tarıhı-ólketaný mýzeıine qoıylǵan Kenesary Qasymulynyń qundy jádigeri de kórme kórkin ashpaq. Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda jasalǵan jumystar da oblystyń EKSPO-2017 kórmesinde kórinis tabady. Máselen, «Túrkistan – túrki áleminiń mádenı astanasy» jyly aıasynda ótken halyqaralyq fotosýretshiler kezdesýinde Ońtústiktiń kıeli jerlerine qatysty túsirilgen foto týyndylardan arnaıy kórme uıymdastyrylyp, óńirdiń tarıhı, kıeli jerlerinen maǵlumattar beriledi.
