Mańǵystaýda sý máselesin sheshýdi odan ári jandandyryp, oryndaýǵa bolady-aý degen múmkindikterdi iske qosý qajet. Qazirgi tańda óńirde teńizdiń tuzdy sýyn tushytatyn zaýyttar salý máselesi jıi kóterilip keledi. Bul baǵytta ózderiniń jobalaryn usynyp, kúrdeli máseleni birlese sheshýge ynta bildirýshiler de joq emes. Solardyń biri − «BeltWay Group Limited» kompanııasy. 1995 jyly Shanhaıda qurylyp, búginde álemdik deńgeıde túrli sala boıynsha qyzmet kórsetip júrgen atalmysh kompanııanyń basshysy Álı Mohamad «Astana Qyzmet-KZ» JShS dırektory Bolat Ydyrysbaev, «SafBon Water Service (Holding) Inc.» mekemesiniń bas menedjeri Vang Ksıanmen at basyn Mańǵystaýǵa burdy. Mańǵystaý oblysynda sý tushytý zaýytyn salýǵa qyzyǵýshylyq tanytqan olar bul turǵyda daıyndaǵan arnaıy jobalaryn jurtshylyq nazaryna usyndy.
Sý tushytatyn jańa zaýyt sońǵy jyldary órkendep, birneshe jańa nysandardyń mekenine aınalǵan, parom keshenimen tanymal Quryq aýylynan 22 shaqyrym jerde ornalasyp, oǵan qorek kózi retinde gaz-týrbınaly elektr stansasy paıdalanylady. Kúnine 80 myń tekshe metr sý tushytatyn zaýyt óz ónimderimen «О́zenMunaıGaz» AQ, Jetibaı, Quryq aýyldary men Aqtaý, Jańaózen qalalaryn qamtamasyz etemiz dep sendirýde. Sondaı-aq, qýattylyǵyn bir deńgeıde ustamaı, eń ozyq tehnologııalardy paıdalaný arqyly bolashaqta aýqymdy ete túsýdi kózdeıtin zaýyttyń jobalaýshylary Mańǵystaýda aýyl sharýashylyǵy salasyn damytý úshin sýmen qamtamasyz etýge atsalyspaq.
Jaqsy usynystar jerde qalǵan joq – Mańǵystaý oblysy ákimdigi atalmysh kompanııamen uzaq merzimdi jáne ózara tıimdi yntymaqtastyq týraly memorandýmǵa qol qoıyp, óńir basshysy E.Toǵjanov jobany daıyndaý jáne júzege asyrý máselelerimen aınalysatyn jumys tobyn qurýdy tapsyrdy.
О́ńir úshin aýyz sý tapshy dep jaıbaraqat otyrý emes, joqtan bar jasap, aýyz sýdy tabý joldary mańyzdy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
