«ÝAZ» kóligin miný Japonııada «naǵyz erkek» bolýdyń belgisi kórinedi. Sebebi, ondaı kólikti júrgizý ájeptáýir kúshke túsedi. Olardaǵydaı bári avtomattandyrylmaǵan. Bizdiń elde de sońǵy ýaqytta eski kólikti qaıta jasap, sándep, ońtaılandyryp, zamanaýılandyryp degendeı, taqymǵa basqandar jaıly jıi estýge bolady. Mundaılardyń kópshiligi ne jaǵdaıy jaqsy adamdar, ne ózi kólik jasaýmen aınalysatyn sheberler.
Al bizdiń keıipkerimizdiń olarǵa asa qatysy joq. Dese de, baryn bazarlap, áıteýir minip júr ǵoı dep basynan sıpaıtyndaı da kúıde emes. O basta onsha kóńil aýdarmappyz, keıin bir dosynan «shohany» jasaý úshin «Toıota-Ipsým» degen mashınany satyp jibergeni jaıly estigende qyzyǵa bastadyq.
...Kólikpen kele jatyrmyz. Jyp-jınaqy, jeńil, júrisi shıraq. Sóıtip kele jatqanda qasymyzdaǵy bireý:
– Anany qara, seniń «shohań» ketip bara jatyr, – dedi.
Tizginde kele jatqan jigit kádimgideı ókpeli daýyspen julyp alǵandaı sóıledi.
– Meniki emes! Menikindeı bolý qaıda-a-a oǵan! – Ájeptáýir taýsylyp otyr.
Qazaq aıtatyn «ishten shyqqan shubar jylan» degen tirkes eske túsken. Keıin ózinen surap, jaǵdaıǵa qanyqqan soń ǵana bulaı bolmas reti joq ekenin túıdik. Tipti, áke-sheshesi de qarsy bolypty. Sat ta, sat dep jıi aıtatyn kórinedi. Olardiki túsinikti, jurttan alabóten, túk tappaı qalǵandaı eski kólikpen júrgenin quptamaıdy. Jurttan uıat! Álgi «toıotany» da otbasynan jasyryp satyp jibergen. Keıipkerimiz bul qylyǵyn jurttan erekshelený úshin emes, bala kezden «Jıgýlı» kórip óskenimen túsindiredi. Bul ıdeıanyń naqty qashan, qalaı paıda bolǵany jaıly suraqqa «bilmeımin sony» dep beıkúná ǵana jaýap beredi.
Kólikti jasaýǵa ákesi men aǵasy kómektesip turady. Al óziniń búkil bos ýaqyty osynyń ústinde ótedi. Úlkenderdiń qarsy bolatynynyń bir sebebi de osy bolsa kerek. Sirá, qumarlyǵy búginde shyǵarmashylyq lázzat deńgeıine jetken jaıy bar. O basta sýretshi bolýdy armandaǵan adam úshin bul da bir shyǵarmashylyq qoı rasynda.
Mashınasy shaǵyn, ózi de qalaqtaı ǵana jigit oblystaǵy jas jýrnalısterdiń biri. «Jetisý» gazetinde isteıdi. Máýlen Ánerbaı degen inimiz. «Shamamen 60 paıyzdaı ózgertken shyǵarmyn», deıdi. Kóp jaǵdaıda mundaı erekshe kólik «jasaýshylardyń» kópshiligi qymbattaý baǵaǵa satyp jatatyn. Al Máýlende ondaı oı joq. Estelik úshin saqtap qoıǵysy keledi. «Jas kezdegi bir qumarlyǵym» dep eske alyp júrýge turarlyq dúnıe, aıtary joq. Degenmen, ómir boıy paıdalanamyn degen oıy joq sııaqty.
«93-jylǵy» kóliktiń burynǵy ıesi orystyń shaly eken. Jaqsy saqtapty. Uqypty shaldan jaqsy jastyń qolyna ótken baqytty mashınanyń jasy qatarlastarynan áldeqaıda uzaq bolatyny sózsiz. Sebebi, áldeqashan tozyp, súıegi shirip ketýge tıis kólikke ekinshi ómir syılaǵan sheber onyń ómirin uzarta túsý úshin aıanyp qalmaıtyn sııaqty. О́zgertsem degen ıdeıa jeterlik. Mine qalǵandar «ınomarkada» otyrǵandaı bolatyn» «shohaǵa» qarap ıesiniń aldaǵy josparlary kezeń-kezeńimen iske asatynyna senýge bolady.
Almas NÚSIP,
«Egemen Qazaqstan»
Almaty oblysy
