Shilde aıynyń qorytyndysy boıynsha QR-daǵy medısınalyq qyzmetter ótken jylmen salystyrǵanda birshama ulǵaıǵan: dárigerdiń alǵashqy qabyldaýy - 9,9%-ǵa, ish qýysyn ýltradybystyq zertteý - 13%-ǵa, jalpy qan analızi - 7,6%-ǵa jáne jalpy nesep analızi - 8,5%-ǵa qymbattaǵan.
Massaj qyzmetteri 6,5%-ǵa, shıpajaı qyzmetteri - 6,8%-ǵa kóterilgen. Stomatologııa qyzmetterinde de baǵalardyń ósýi baıqalady: tis julý quny bir jylda 10%-ǵa ósken.
Sonymen birge, densaýlyq saqtaý júıesindegi eńbekaqy ósimi aıtarlyqtaı joǵary emes. 2017 jyldyń II toqsan qorytyndysynda jalpy densaýlyq saqtaý jáne áleýmettik qyzmetter salasyndaǵy ortasha aılyq jalaqy ósimi 6,1% paıyz ǵana bolǵan, bul rette naqty jalaqy ındeksi sala qyzmetkerleriniń satyp alý qabiletiniń 1,3%-ǵa azaıǵanyn kórsetti.
О́zge áriptesterimen salystyrǵanda, aýrýhana uıymdary qyzmetkerleriniń eńbekaqysy kóbirek ósken (bir jylda 7%-ǵa), degenmen bul sala qyzmetkerleriniń de satyp alý qabileti bir jylda 0,5%-ǵa tómendegen.
Odan bólek, densaýlyq saqtaý jáne áleýmettik qyzmetter salasynyń qyzmetkerleri QR boıynsha jalpy qyzmetkerlerden 24,3%-ǵa tómen jalaqy alady.
Degenmen, densaýlyq saqtaý mınıstri Eljan Birtanov bolashaqqa jaǵymdy boljam jasap otyr: mindetti medısınalyq saqtandyrý júıesindegi dárigerlerdiń ortasha jalaqysy artatyn bolady. Mınıstrdiń pikirinshe, klınıkalardyń tabysy kóbeıgen soń, jalaqy ósedi. Úzdik klınıkalar báseke negizinde óz tabystaryn kóbeıtip, dárigerleriniń jalaqysyn kótere alady.
Eske sala ketsek, MÁMS boıynsha alǵashqy jarnalar men aýdarymdar bıylǵy shilde aıynda túse bastady.
2017 jyldyń II toqsanynyń qorytyndysy boıynsha, bir jylda densaýlyq saqtaý jáne áleýmettik qyzmetter júıesindegi qyzmetkerler sany 8%-ǵa ósken. Bárinen buryn aýrýhana uıymdarynyń qyzmetkerler sany artqan: olardyń tizimdik sany 8%-ǵa, naqty sany 7,9%-ǵa kóbeıgen. Áleýmettik qyzmet salasynda turǵylyqty jermen qamtamasyz etpeıtin qyzmet kórsetý segmentinde qyzmetkerlerdiń kóbeıgeni baıqalady, olardyń tizimdik sany 9,3%-ǵa, naqty sany 11,5%-ǵa artqan.
Jalpy alǵanda, ótken jyly densaýlyq saqtaý salasyndaǵy jumyspen qamtýdyń aıtarlyqtaı óskeni baıqalady. 2016 jyldyń qorytyndysy boıynsha, dárigerler sany 7%-ǵa, 74,6 myńǵa deıin artqan, ortasha medısınalyq qyzmetkerler sany - 4,2%-ǵa (170,8 myń adam) ósken. 2015 jyly dárigerler sanynyń artýy 1,2%-dy, ortasha medısınalyq qyzmetkerler sanynyń kóbeıýi - 2,4%-dy quraǵan.
