Apparat májilisinde kúntártibine saı ótken aptanyń sońynda óńirge jumys babymen kelgen Úkimet basshysy saparynyń qorytyndysy shyǵaryldy. Sondaı-aq, oblysta mindetti áleýmettik medısınalyq saqtandyrýdy engizý boıynsha atqarylyp jatqan jumystardyń barysy sóz boldy. Bul týraly oblystyq densaýlyq saqtaý basqarmasy basshysynyń mindetin atqarýshy Sáýle Qısyqova men oblystyq jumyspen qamtýdy jáne áleýmettik baǵdarlamalardy úılestirý basqarmasynyń basshysy Dına Ahmetjanova aıtyp berdi.
Oǵan qosa aýdandyq mańyzdaǵy qala, selolyq okrýg, kent ákimderiniń saılaýyna daıyndyq sharalaryna da nazar aýdaryldy.
Májiliste jınalǵandarǵa jańadan qurylǵan Aqmola oblysy boıynsha memlekettik satyp alýlar jáne kommýnaldyq menshik basqarmasyna oblys ákimi Málik Myrzalınniń 2017 jylǵy 31 shildedegi ókimimen jańadan taǵaıyndalǵan basshy Nurlan Jeksembaıuly Bekenov tanystyryldy.
Nurlan Jeksembaıuly 1961 jyly Solústik Qazaqstan oblysy Taıynsha aýdany Keńes aýylynda týǵan. Zooınjener, býhgalter-ekonomıst, ekonomıka magıstri tárizdi úsh joǵary bilimi bar.
Eńbek jolyn 1982 jyly burynǵy Kókshetaý oblysynyń Ternov sovhozynda bastaǵan.
Qarjy salasynda mol tájirıbesi bar. Uzaq jyldar boıy Aqmola oblysynyń qarjylyq baqylaý basqarmasy basshysynyń orynbasary, «Qazaqstan halyq banki jınaqtaýshy zeınetaqy qory» AQ-nyń Aqmola fılıalynyń dırektory, QR Qarjy mınıstrliginiń qarjylyq baqylaý komıteti sapany baqylaý basqarmasynyń basshysy qyzmetin atqardy.
2011 jyldyń tamyz aıynan bastap, jańa qyzmetke taǵaıyndalǵanǵa deıin Aqmola oblysy ishki memlekettik aýdıt departamentiniń basshysy laýazymynda boldy.
