«Sálem, Astana» jobasy Ýrbanıstıka jáne Astana qalasy ákimdiginiń qoldaýymen EKSPO-2017 úshin FutureCreative brıtan mádenı baǵdarlamasy sheńberinde Brıtan Keńesimen iske asyrylýda.
Joba búgingi kúnnen jumysyn bastaıdy. Jobany ázirlep jatqan mamandardyń aıtýynsha, jobaǵa Astana qalasyndaǵy kez-kelgen qala turǵyny, qonaǵy qatysa alady. Qalamen «sóılesýdi» bastaý úshin FacebookMessenger qosymshasy arqyly SalemAstana2017 (https://www.facebook.com/salemastana2017/) qoldanýshysyna «Sálem» sózimen, ózi turatyn kósheniń ataýy men úıdiń nómirin qosa kórsetip, habarlama jiberý kerek. Odan keıin habarlama jibergen adamǵa jaýap hat (habarlama) keledi. Qalamen baılanys ornatýda onymen «sóılesý» 4-5 suraq qoıý arqyly jáne oǵan túrli taqyrypta jaýap alý arqyly ótedi. Qalamen baılanysty qazaq, jáne orys tilderinde júrgizýge bolady.
- «Sálem Astana» brıtandyq EKSPO baǵdarlamasy aıasyndaǵy jobalardyń biri. «Sálem Astana» brıtandyq «HelloLampPost» dep atalatyn jobasynyń nusqasy deýge bolady, - dedi BritishCouncil mádenı jobalar jetekshisi Galına Koreskaıa.
Interaktıvti «Sálem, Astana» jobasy qala turǵyndaryna ózderiniń súıikti shaharlarymen «sóılesip», baılanys ornatýyna múmkindik beredi; kez-kelgen qala turǵyny shahar týraly óziniń pikirimen ne bolmasa alǵan áserimen bólise alady, qalany jańa turǵydan tanyp, mol aqparat jınaı alady, ózge de adamdardyń pikirin bile alady. Joba qalanyń Saryarqa, Almaty, Esil syndy 3 aýdanyn qamtıdy. Astana osyndaı jobalar iske asyrylyp jatqan álemdegi segizinshi qala bolyp tabylady. Atap aıtar bolsaq olardyń ishinde London, Tokıo sekildi qalalar bar.
Joba qalaǵa kúndelikti ómirde turǵyndar jumysqa nemese balasyn balabaqshadan alýǵa asyǵyp bara jatyp ne oılaıtynyn bilýge múmkindik beredi. Qaladaǵy oryndar arqyly kúndelikti áńgimelesý tásilimen adamdar neni armandaıtynyn, ne mazalaıtynyn, nemenege umtylatynyn bilýge bolady.
