Alataý aýdanynda ornalasqan №14 qalalyq emhana bastapqy medısınalyq-sanıtarııalyq kómek kórsetetin derbes uıym. Emhana 35 myńǵa jýyq tirkelgen jandarǵa medısınalyq kómek kórsetetin aýqymdy emdeý ortalyǵy bolyp tabylady.
Halyqqa sapaly medısınalyq kómek kórsetý úshin emhana tolyqtaı jabdyqtalǵan jáne onda bilikti medısına mamandary, densaýlyq saqtaý isiniń úzdikteri, "Altyn dáriger", "Meıirim" tós belgilerimen marapattalǵan joǵary sanatty dárigerler men medbıkeler jumys isteıdi.
Jıynǵa «Nur Otan» partııasy Alataý aýdanynyń fılıaly tóraǵasynyń birinshi orynbasary Muqanǵalı Almasaev, Densaýlyq saqtaý basqarmasy basshysynyń orynbasary Janar Kenjebaeva, Alataý aýdany ákiminiń orynbasary Saıat Aǵybaev jáne qalalyq máslıhat depýtattary qatysty.
Serik Seıdýmanov memlekettik jáne úkimettik baǵdarlamalar, nátıjeli jumyspen qamtý jáne jappaı kásipkerlikti damytý baǵdarlamasyna qatysty suraqtarǵa jaýap berip, júıeli reformalardy jalǵastyrýdyń mańyzdylyǵy jóninde aıtyp ótti.
Densaýlyq saqtaý salasynyń qyzmetkerleri mindetti áleýmettik medısınalyq saqtandyrý júıesin engizý jáne Alataý aýdanyn qoǵamdyq kólikpen qamtamasyz etý jóninde suraqtar qoıdy. Sonymen qatar, dárigerler medısına salasy boıynsha joǵary oqý oryndaryn bitirgen túlekterdiń óz eńbek jolyn bastapqy medısınalyq sanıtarııalyq kómek kórsetý júıesinen bastaýyn usyndy.
– Ult jospary «100 naqty qadam» bizdiń elimizdi jáne onyń barlyq salasyn reformalaý maqsatynda naqty áreket etýge yqpal etetin jospar dep aıta alamyn. Munda medısınanyń alar orny erekshe. Ult jospary boıynsha mindetti áleýmettik medısınalyq saqtandyrý qabyldanǵan zańdar sheńberinde 2018 jyldyń 1 qańtarynan bastap óz kúshine enedi. Alataý aýdanyndaǵy №14 emhanada kezdesý uıymdastyrýyma da naqty sebep osy bolyp otyr. Basty maqsat osy júıeniń is barysynda qalaı jumys isteıtinin kórý, – dedi Serik Seıdýmanov.
№14 qalalyq emhana bas dárigeriniń orynbasary Baqyt Úzdembaevanyń aıtýynsha, emhana qyzmetkerleri saqtandyrý júıesimen tolyqtaı tanys jáne kelgen emdelýshilerdiń bárin aqparattandyrýda.
– Ujym atynan búgingi kezdesýge alǵys bildirgim keledi jáne Qazaqstan Respýblıkasy Parlamenti Májilisiniń zań shyǵarý qyzmetimen tanysý biz úshin úlken qýanysh. Depýtattardyń bastapqy medısınalyq-sanıtarııalyq kómek kórsetý salasyna osylaı jaýapty qaraýy óte mańyzdy, – dedi óz sózinde Baqyt Úzdembaeva.
Májilis depýtaty Almaty qalasyndaǵy issapary barysynda, sondaı-aq, qalalyq áýejaıda, «Kazferrostal» kásipornynda, memlekettik organdar ókilderi jáne Qoǵamdyq keńes ókilderimen kezdesý ótkizedi.
Almaty
