Ári qaraı oblys ákimi Berdibek Saparbaev birinshi vıse-premerdi Aqtóbedegi memleket-jekemenshik áriptestigi jobalarymen tanystyrdy.
Atap aıtqanda, A.Mamın tek hokkeıshilerdi ǵana emes, mánerlep syrǵanaý men short-trek boıynsha bolashaq chempıondardy daıyndaıtyn «Olımp» hokkeı modýlinde boldy. Aıta ketý kerek, bul – táýelsizdik jyldarynda salynǵan qysqy sport túrin damytatyn alǵashqy sport ǵımaraty.
Kelesi kezekte birinshi vıse-premer jańa oqý jylynda «Symbat» jekemenshik mektebiniń janynan ashylatyn aýyldan kelgen daryndy balalarǵa arnalǵan ınternatta boldy. Sonymen qatar, A.Mamın Qazaqstanda balamasy joq 110 oryndyq jetim balalarǵa arnalǵan quny 1,6 mlrd teńge bolatyn «Meıirim» áleýmettik úıin qarap shyqty.
О́ńir úshin mańyzdy bolyp tabylatyn nysandar salynyp jatqan qurylys alańdaryn aralaý kezinde oblys ákimi Berdibek Saparbaev atalǵan nysandardyń júzege asyrylýy, eń aldymen, oblys bıýdjetine túsetin salmaqty azaıtýǵa, qosymsha jumys oryndaryn qurýǵa, mektepke deıingi bilimmen qamtýdy, sonymen qatar, medısınalyq qyzmet kórsetý sapasyn arttyrýǵa aıtarlyqtaı múmkindik beretinin atap ótti. Budan ózge birinshi vıse-premer birqatar iri kásiporyndardyń qyzmetimen tanysty.
Sonymen, jýyrda ǵana qýattylyǵy jylyna 50 myń tonna bolatyn munaı-gaz jabdyqtary men qubyrlar shyǵarýdy bastaǵan «Qazaqstan munaı jabdyqtary zaýyty» JShS-de boldy. Jobanyń jalpy quny 5 mlrd teńgeni quraıdy.
Elbasynyń halyq turmysynyń deńgeıi men sapasyn arttyrý tapsyrmasyn oryndaý maqsatynda óńirde aýyldyq eldi mekenderdi gazdandyrý sharalary júrgizilýde. Osyǵan baılanysty oblys ákimdigi men «QazTransGaz» AQ arasynda memorandýmǵa qol qoıylyp, sonyń aıasynda Qazaqstanda, ıaǵnı Aqtóbede gaz taratýdy edáýir arttyrýǵa múmkindik beretin «AGRS 300» avtomattandyrylǵan gaz taratý beketi salyndy. Aıta ketý kerek, sońǵy eki jylda Aqtóbe oblysynyń gazdandyrý deńgeıi 60%-dan 87%-ǵa deıin artty.
Budan basqa, A.Mamın óz qyzmetin «QazAgroQarjy» AQ qoldaýymen IIDMB aıasynda júzege asyryp otyrǵan óńirdegi iri jylyjaı keshenderiniń biri «Grın Haýs Qazaqstan» seriktestiginde atqarylǵan jumystarǵa den qoıdy. Jobany júzege asyrý oblystyń jańa pisken kókónisterge degen qajettiligin tolyqtaı qamtamasyz etýge, sonymen qatar, artyq ónimdi Reseıge eksporttaýǵa múmkindik beredi.
Jylyjaıda Asqar Mamınge Elbasynyń azyq-túlik qaýipsizdigin qamtamasyz etý, óńiraralyq kooperasııa men sýarmaly eginshilikti damytý boıynsha tapsyrmasyn oryndaýda óńirde qoldanylyp jatqan sharalar týraly baıandaldy.
Búgin Premer-Mınıstrdiń birinshi orynbasary Asqar Mamınniń Aqtóbe oblysyna jumys sapary odan ári jalǵasady.
Temir QUSAIYN,
«Egemen Qazaqstan»
AQTО́BE
