– Telehıkaıanyń halyqty baýrap alýynyń basty sebebi de osy, – deıdi ártis Nýrettın Sonmez kópshilikpen júzdesý kezinde. − Rasynda, kóshpendi ómirdiń sýrettelýi, kóshpeli mádenıet dekorasııasynyń qanyq boıaýmen berilýi, tipti keıbir kadrlardan, kıiz úı men tósenish tekemetterinen qazaqy qoshqar múıiz oıýlardy baıqaısyz.
Telehıkaıanyń rejısseri Mehmet Bozdogtiń aıtýyna qaraǵanda, fılm Osman ımperııasynyń qurylar dáýirin baıandaıdy. Týyndyny menshik ıesi retinde óndiriske shyǵarǵan Kemal Tekdenniń «Tekden Film» stýdııasy. Serıal kórermenge bir demde unady. Tipti túsirilim alańyna prezıdent Rejep Taııp Erdoǵannyń ózi kelip, sáttilik tilegen.
«Kınonyń bas keıipkeri Ertuǵyryl Oǵyz taıpasynyń Bozoq qanatynan taraıtyn Qaıy rýynyń kósemi. Ataqty Osmanly ımperııasynyń negizin qalaýshy Osmannyń ákesi. Imperııany 623 jyl bılegen áýlet osy kisiniń urpaqtary. Sondyqtan da ǵalamǵa alty ǵasyrdan astam ústemdik júrgizgen babalarymyzdyń batyrlyq tarıhyn somdaýǵa kiristik», deıdi ekinshi qonaq Jengız Joshkýn myrza.
Kezdesýdiń resmı bóligi aıaqtalǵan soń ártister Nýrettın Sonmez ben Jengız Joshkýn kórermender tarapynan qoıylǵan suraqtarǵa jaýap berdi. Áýeli ózderiniń qazaq jurty men topyraǵyna qaýyshqan sátin baqytqa balaıtynyn aıta otyryp, bul týyndy tek túriktiń ǵana emes, kúlli túrki jurtynyń tarıhy, biz ben sizdiń erlik dáýirindegi ortaq rýhymyz toǵysyp jatqan dúnıe degendi jetkizdi.
«Telehıkaıanyń túsirilý jumystary qalaı júrip jatyr?» degen kórermen suraǵyna: «Qazir fılmniń 4-shi maýsym jumystary júrip jatyr. О́kinishke qaraı, áli de mashaqattar barshylyq. Minis attary jaramaı qalýy, ózderińiz kınodan kórgendeı kıiz úılerdiń jel-quzǵa tótep berýi sııaqty aǵymdaǵy sharýalardan bastap qıyndyqtar kóp. Biraq biz munyń bárin eńseremiz», dedi mártebeli qonaq.
Beken Qaıratuly,
«Egemen Qazaqstan»
Sýretti túsirgen
Orynbaı Balmurat,
«Egemen Qazaqstan»
