«Bıyl josparlanǵan 381 jylý eseptegish quraldyń 50-i ǵana qoıyldy. Árqaısysynyń quny 707 myńnan 913 myń teńge aralyǵynda. Buǵan quraldy ornatý, jobalyq-smetalyq qujattamalardy rásimdeý de kiredi. Úkimet tórt jylǵa bólip tóleý sekildi jeńildikti kepildik berip otyr. Onyń ústine ornatý merzimi kezinde tehnıkalyq qyzmet pen bir rettik memlekettik tekseris tegin júrgiziledi. Qalada eski 180 úı bar. Olarǵa jylý eseptegish ornatylmaıdy», deıdi «Sevkazenergosbyt» JShS bas dırektorynyń mindetin atqarýshy Maǵaýııa Saǵyndyqov.
Mamandardyń aıtýynsha, eseptegish quraldardy paıdalanatyn úılerdiń turǵyndary basqalarǵa qaraǵanda tólemaqyny 1,5 ese az tóleıdi. Alaıda, olardy ornatýǵa ótinishterdi qabyldaý qazan aıynda aıaqtalatynyna qaramastan turǵyndardyń kóbi qulyqsyz. Onyń únemdegish qyzmetine kúmándanýshylar az emes. Túsinik jumystarynyń jan-jaqty júrgizilgenine qaramastan tutynǵan jylýdy ǵana esepteıtinin eskergileri kelmeıdi.
Qazirgi tańda jylý men jaryq úshin qaryzdary shash etekten asatyn tulǵalar jeterlik. Olardyń birqataryn kompanııa sotqa beregen. Tek sot oryndaýshylary jyljymaly jáne jyljymaıtyn múlikterin saýdaǵa qoıǵannan keıin ǵana bereshekterin óteı bastaıtyn kórinedi.
Búgingi kúni jeke sot oryndaýshylar qaryzy 18 mln teńgege jetken 41 adammen esep aıyrysýǵa kirisken. Is nátıjesiz emes. Máselen, 10 jyl boıy jylý men jaryqty «tegin» paıdalanyp kelgen bir tutynýshynyń jyljymaıtyn múligi sot sheshimimen satylymǵa qoıylǵany sol-aq eken, 440 myń teńgeni qaltasynan shyǵaryp beripti.
Tutastaı alǵanda, turǵyndardyń qaryzy 342,2 mln teńgeni qurap otyr. Onyń 202,1 mıllıony zańdy tulǵalarǵa tıesili.
"Sevkazenergosbyt" JShS-ne qarasty 160 myń abonent bolsa, olardyń 1-3 paıyzy tólemaqylardy jyldap tólemeıtinge uqsaıdy.
О́mir ESQALI,
«Egemen Qazaqstan»
