Kórermender nazaryna tamyzdyń 15 men 20 aralyǵynda EKSPO-2017 kórmesiniń Kongress-ortalyǵy alańynda «Múzyka qudireti» atty shoý usynylady. Top músheleriniń aıtýynsha, bul kesh burynǵy konsertterinen ózgeshe.
«Mereıtoıdy óz otanyńda toılaý óte qýanyshty syılyq. Aǵashtyń sabaqtary jan-jaqqa qarap ósse de, onyń tamyry bir jerden bastaý alady. Bizdiń top osynda qurylǵandyqtan, tamyrymyz Qazaqstanda. Eki jyl buryn osyndaı deńgeıde konsert ótkizsek dep josparlap bastaǵan bolatynbyz. Soǵan qosa EKSPO-2017 ótetinin de esten shyǵarmadyq. Sáti túsip, eki aýqymdy shara birigip ótetin boldy. Birden aıta keteıin, bizdiń top buǵan deıin osyndaı shoý qoıyp kórgen emes. Biz úshin bul úlken qurmet», dedi toptyń kóshbasshysy Baıǵalı Serkebaev.
Al konsert baǵdarlamasy jónindegi suraqqa toptyń ánshisi Ketı Topýrııa bárin qupııa saqtap, qonaqtarǵa ádemi kesh syılaǵylary keletinin aıtty.
Toptyń málimdeýinshe, mereıtoılyq konsertter birneshe qalada ótkiziledi. Atap ótsek: Astana, Almaty, Sankt-Peterbýrg jáne Máskeýde. Alaıda, Astana alańynyń tehnıkalyq qurylǵylarynyń artyqshylyǵynan, eń aýqymdy ári áserli shoý elordamyzdyń tórinde ótedi deıdi uıymdastyrýshylar.
«Bizge kóp adamdar 6 kún qatarynan kúnine 2 ret konsert qoıý qıyn emes pe dep surap jatady. Biraq keshe EKSPO-2017 alańynda úsh aı qatarynan óner kórsetip jatqan Dıý Soleı sırkiniń qoıylymyn kórip, bizge «qıyn» dep aıtý uıat sekildi», dep kúldi toptyń bas-gıtarashysy Vladımır Mıkloshıch.
«Mýzyka Qudireti» konsertiniń qoıýshy-rejısseri Vıacheslav Kýlaevtyń aıtýynsha, Kongress-ortalyǵynyń jabdyqtalýy eshqandaı qıyndyq týǵyzbady.
«Búkil oılaǵan josparlarymyzdy iske asyra alamyz. Bizdiń maqsatymyz kórermenderge umytylmas shoý syılaý. Jáne bul úshin barlyq jaǵdaı qarastyrylǵan. Soǵan qosa, kórermendermen ınteraktıv uıymdastyramyz», - dedi qoıýshy-rejısser.
Sonymen qatar, A’Studio toby balalar úıleriniń tárbıelenýshilerine 2000 bılet syıǵa tartqan eken.
Aıta keteıik, konsert tamyzdyń 15-20 aralyǵynda saǵat 18:00 ben 21:00-de EKSPO-2017 alańynda ornalasqan Kongress-ortalyǵynda ótedi. Bıletter qala kassalary men expo2017astana.com saıtynda satylady.
Aıgúl ShERNIIаZ
«Egemen Qazaqstan»
Sýretti túsirgen Orynbaı BALMURAT
«Egemen Qazaqstan»
