Feısbýktegi jarııalaǵan jazbasynda boıjetken ózin Eýropany aralap júrgen kezinde tonap ketkenin atap kórsetken. Dınara sońǵy saparyn Býdapesht qalasyna jasaǵan. Sol jaqtan eline qaıtýǵa bel sheshken eken. Alaıda Vengrııanyń astanasynda ony Býdapesht reısinen túsirip ketken.
«Býdapeshtte tek bir tún túnep, erteńinde qaıtpaq edim. Biraq, ol jaqtaǵy Wizzair avıakompanııasy meni reısten túsirip jiberdi. Buǵan eki nárse sebep boldy: birinshiden, meniń Ispanııadaǵy QR elshiliginen alǵan jasyl anyqtama men ekinshiden reıske tirkelý úshin 80€ aqsha tóleýimiz kerek bolatyn. Mende ol kezde 5€ ǵana qalǵan edi, reıste múlde tamaq bermeıtindikten, oǵan sý satyp alyp ishýdi oılap otyrǵanmyn», - deıdi Dınara.
Osylaısha, bizdiń otandasymyzǵa ne aqshasyz, ne qujatsyz taǵy da 4 kúnge Býdapeshtte qalýǵa týra keledi. Boıjetkenge taksı júrgizýshisi kómektesip, QR elshiliginiń ǵımaratyna deıin jetkizip tastaǵan.
«Jelbiregen Kók tý meniń kóńilime úmit otyn uıalatyp, kire beristegi apaıdyń «Siz kimge?» degen suraǵy tipti qýantyp jiberdi. Men basyma is túskenin aıtyp berdim. Ne deıin? Bir sózben, meni sol jaqta qaıyrshyǵa aınalyp ketýden Vengrııadaǵy Qazaqstan Respýblıkasy elshiliginiń qyzmetkerleri qutqaryp aldy! Maǵan kómek qolyn sozǵanymen qosa, 4 kún boıy Býdapeshttegi shyǵynymdy ótep berip, úıge ornalastyrdy. Sózben jubatty. Men ómirimde osyndaı adamdarǵa kezikkenime shyn júrekten qýanyshtymyn. Tipti konsýl meni áýejaıǵa deıin shyǵaryp saldy. Álbette, olarǵa aýyrtpalyq salǵanymdy bilemin. Dese de, olarǵa zor alǵysymdy bildirgim keledi. Ásirese, Abaı Dosalıev pen konsýl Ázız Qaldybekovke kóp rahmet aıtamyn. Osyndaı adamdarmen tanysqanyma maqtanamyn», - dep jazdy Dınara.
