Arheologııalyq bólimde akademık Álkeı Marǵulannyń 1952 jyly jasaǵan ekpedısııasynda tabylǵan Beǵazy-Dándibaı mádenıeti zamanyndaǵy zattardy kórýge bolady. Ekspozısııaǵa ydystar, eńbek quraldary jáne oqtardyń ushtary qoıylǵan. Sondaı-aq, qundy jádigerlerdiń qatarynda turmystyq zattar da bar. Olardyń ishinde bir qaralyǵy jartylaı qymbat tastarmen jáne jezben qaptalǵan er toqym boldy.
– Bul toqym qoldan jasalǵan. О́zderińiz kórip turǵandaı, ol sál qajalǵan. Demek jıi qoldanylǵan, – deıdi oblystyq ólketaný murajaıynyń dırektory Erjan Nurmaǵambetov. – Mundaı er toqymdar tek dáýletti aqsúıekterge ǵana tıesili bolǵan. Ony úzdik, tanymal sheberlerge ǵana tapsyrys bergen.
Kórmedegi «Alash» partııasy hattarynyń, buıryqtarynyń jáne qujattarynyń kóshirmeleri arasynda partııanyń jınalystary týraly habarlandyrýlardan bastap, «Alashorda» qozǵalysynyń kóshbasshylaryna, onyń ishinde Álıhan Bókeıhanǵa da qatysty jarııalanǵan úkimder men jazalar da bar.
– Eń mańyzdy qujatty atap ótý qıyn, – deıdi murajaı dırektory. – Mańdaısha jazýlar da, qazaly qaǵazdar da bar. Alaıda olardyń tarıhı mańyzdylyǵy azaımaıdy. Bul qujattar táýelsizdik alǵan soń kópshilik nazaryna usynylǵan, oǵan deıin muraǵattarda «óte qupııa» grıfimen saqtalǵan.
Sonymen qatar, oblystyq murajaıǵa Aqtoǵaı aýdanynda ómir súretin janýarlardyń tulyptary men Qazaqstannyń eńbek sińirgen mádenıet qaıratkeri Sahı Romanovtyń sýretteri de qoıylǵan.
Mıras ASAN,
«Egemen Qazaqstan»
Qaraǵandy oblysy
