Arqany keńge salýǵa bolmaıdy

Kúzdiń jıyn-terini aıaqtalyp qaldy  eken dep bosańsýǵa áli erte. Ásirese, Arqa óńiri úshin! Alda qytymyr qys­tyń úskirik aıazy men doldana soǵar borany almas qylyshtaı jalańdap tur. Byltyr jaǵalary jaılaýda júrgender «ústi-bas aq qyraý, túsi  sýyq» jannan taıaqty ońbaı jegen bolatyn. Alaıda, aldaǵy qysqy maýsymǵa ázirlik barysy keı basshylardy áli de oılandyryp-tol­ǵandyrmaıtyn tárizdi. Osynaý mańyz­­dy máseleni talqylaýǵa arnalǵan  basqosýǵa birqatar jaýapty memlekettik organ basshylarynyń  tóbe kórset­peı orynbasarlaryn jiberýi «tótenshe jaǵdaılarǵa» aldymen jaýapty ekendikterin esten shyǵaryp alsa kerek. Oblys ákiminiń birinshi orynbasary Aıdarbek Saparovtyń tóraǵalyǵymen ót­ken basqosýda  gıdroqurylǵylardyń apat­syz jumys isteýin qamtamasyz etetin azamattyq qorǵanys sharalaryn oryndaýdaǵy aldaǵy mindetter jan-jaqty talqylandy. Oblystyq tótenshe jaǵdaılar jó­nin­degi departament bastyǵynyń oryn­basary  Aleksandr Shvesov alda qyrýar ister kútip turǵanyn, eń bastysy, na­zar­dy jylytý qosyndaryn qurý qajet­tigine, jedel qutqarý toptaryn arnaıy tehnıkalarmen jabdyqtaýǵa aýdardy. Aıazdy, borandy kúnderi  eldi mekender  arasynda baılanystyń úzilip qalý jaǵ­daılary jıi kezdesedi. Sondyqtan  jetkilikti azyq-túlik, medısınalyq preparattar qoryn jasaý qajettigin aıta kelip, ótken qysta birqatar problemalar týyndaǵanyn eske saldy. «Soltústik Qazaqstan gıdrometeorologııalyq orta­lyǵy» dırektorynyń orynbasary Qym­bat Merǵalımovanyń aqparaty da jı­nalǵandardy qýanta qoıǵan joq.  Al­dyn-ala boljamǵa qaraǵanda, qyraýly qystyń qytymyr minezi az bolmaıtyn tárizdi. Dáýreni júrisimen-aq synap baǵasy 30 gradýsqa jetip, tipti odan da tómendeıtin kórinedi. Sondyqtan ba­ryn­sha saqtanǵan jón, dedi ol.  Kezek ener­getıka jáne kommýnaldyq sharýa­shylyq basqarmasynyń bastyǵy Anton Fedıaevqa kelgende jınalys saıyn syn­nan kóz ashpaıtyn bul sabazyń ne aıtar degendeı  zal ishi siltideı tyna qaldy.  Joq, bul joly onyń baıandamasynyń tigisi jatyq shyqty. Sirá, ótkir syndar biraz shıratqan bolý kerek. 3 qazannan bastap 590 ǵımaratqa jylý berilipti.  Bilim jáne densaýlyq mekemeleri birinshi kezekte qamtamasyz etilipti. Petropavl qalasy ákiminiń orynbasary Anton Makarov  turǵyn úıler túgelge jýyq  jylytý maýsymyna tas-túıin daıyn eke­nin málimdedi. Sý taratatyn qubyr­lar­dyń jaramdylyǵy tekserýden ótip, oryn alǵan kemshilikter dereý túzeti­lip­ti. Kerisinshe,  Soltústik Qa­zaq­stan  elektr jelilerin taratý kom­pa­nııasy­nyń bastyǵy Vıktor Ten  elektr qýa­tyn qabyldaý jónindegi qujattar tap-tuınaqtaı ázir etilmegendikten, birqa­tar áleýmettik-turmystyq nysan­dar­­dyń jaryqsyz qalý qaýpi bar deı kelip, órttiń jartysyna jýyǵy elektr sym­da­rynyń tuıyqtalýy saldarynan  oryn alatynyn renishpen jetkizdi. Keńeste  avtokólik joldary komıteti jergilikti departament bastyǵynyń orynbasary Arman Júsipovtyń, jolaýshylar tasy­ma­ly  jáne avtokólik joldary basqar­ma­sy bastyǵynyń orynbasary Serik Muhamadıevtiń biraz qyzarýyna týra keldi. Oblystyq ma­ńyz­daǵy joldardy kútip ustaý máse­lesine qatysty aryz-shaǵym kóbeımese, azaıar emes. Máse­len, Ǵ.Músirepov aý­danynda  jaýapty oryn­dar­dyń sal­ǵyrt­­tyǵynan jolda batyp qalǵan kólikter men adamdarǵa kómek  keshigip jetken. Jol belgilerin qalpy­na keltirýde de kemshilikter joq emes. Jıynda 2011-2012 jyldardaǵy qysqy maýsymda  TJM aýmaqtyq qury­lymdary men jergilikti basqarý organ­darynyń ázirligin kúsheıtý mindetteri belgilendi. О́mir ESQALI. Soltústik Qazaqstan oblysy.