Depýtattar áýeli kún kózinen qýat alatyn «Býrnoe Solar-1» stansasyna bardy. Jobaǵa salynǵan jalpy ınvestısııa quny 122 mıllıon AQSh dollaryn quraıdy. Ortalyq Azııadaǵy eń iri stansa qurylysyn «Samuryq-Qazyna Invest» JShS brıtandyq UG Energy Limited kompanııasymen birge júrgizgen. Sondaı-aq, sapar barysynda depýtattar «Gambýrg» sharýa qojalyǵynyń jumysymen tanysty. Atalǵan sharýa qojalyǵynyń qaramaǵynda 2500 gektar jer bar. Munda iri qara mal jaıylyp, jem-shóp daqyldary ósiriledi. Sharýashylyq kún saıyn 10 tonna sút óndiredi.
Sodan keıin depýtattar aýdan ortalyǵy – Baýyrjan Momyshuly aýylyna kireberis betkeıde ornalasqan «Jýaly aýdanynyń qurmetti azamattary» alleıasynda boldy. Atalǵan alleıa táýelsizdiktiń 25 jyldyǵyna oraı paıdalanýǵa berilgen. Alleıaǵa baratyn baspaldaqtyń qaq ortasyna alyp kitap beınesi ornatylǵan. Onyń oń jaq betine Táýelsizdiktiń 25 jyldyǵynyń keskindemesi, sol jaq betinde «Jýaly aýdanynyń qurmetti azamattary» degen jazý bar. Qurmetti ataqty ıelengen 148 azamattyń árqaısysy elimizdiń ósip-órkendeýine úles qosyp keledi.
Budan keıin depýtattar aýdan ortalyǵyndaǵy «Býrnoe» sút kompanııasyna baryp, onyń jumysymen tanysty. Búginde atalǵan kásiporyn kúnine 25 tonna sút qabyldap, odan irimshiktiń birneshe túrin, sút, taǵy basqa ónimder óndiredi. Mundaǵy jumystyń barysyn kompanııa dırektory Á.Poshqaev keńinen tarqatyp aıtty.
Sodan soń, halyq qalaýlylary «Agroazyq-túliknanmenjabdyqtaý» JShS-nyń jumysymen tanysyp, B.Momyshuly aýylynyń turǵyndarymen kezdesti. Osy oraıda B.Ertaev pen S.Omarov Baýyrjan Momyshuly atyndaǵy memorıaldyq mýzeıge de arnaıy bardy. Mýzeıdiń ǵylymı qyzmetkeri U.Ismaılova depýtattardy jádigerlermen tanystyryp, batyrdyń ómirinen tyń maǵlumattar berdi.
Hamıt ESAMAN,
«Egemen Qazaqstan»
Jambyl oblysy
