Jýel DIýPRAT, Fransııa:
– Biz otbasymyzben bıylǵy demalysymyzdyń eki aptasyn Qazaqstanda ótkizýge sheshim qabyldadyq. Jubaıym – Sılvııa men qyzym Heloız úsheýimizdiń kelgenimizge bir aptadaı ýaqyt boldy. О́zimiz qazaq eline alǵash ret saparlap otyrmyz. Shynymdy aıtsam, buryn Qazaqstan týraly estigenimizben, elderińizdi osynsha damyǵan dep oılamappyz. Kelgeli Astananyń ádemi kórinisin kórip, tańǵalysymyzdy jasyra almadyq. Arasynda Almatyǵa da jol túsip, onyń ádemi taýlaryn kózimizben kórip, tamsanyp qaıttyq. Qazaqstandaǵy EKSPO kórmesi biz úshin erekshe este qalarlyq estelik boldy. Qaı el de kórmege úlken ázirlikpen kelgeni kórinip tur. Ásirese, Malaızııa, Avstralııa, Germanııanyń pavılondary kóńilimizden shyqty. Otanymyz – Fransııanyń pavılonyna da bas suqtyq. EKSPO kórmesindegi eń úlken úsh pavılonnyń biri Fransııaniki ekenin estip, qýanyp qaldyq. Munyń ózi eki eldiń arasynda jaqsy qarym-qatynas ornatylǵanyn kórsetedi. Jubaıym ekeýimiz de sýretshimiz. Úıge oralysymen Astana týraly, onyń ásem kórinisterin beıneleıtin sýretter toptamasyn shyǵarmaq oıymyz bar. Aıtpaqshy, EKSPO alańynda oınalyp turatyn qazaqtyń mýzykasy júregimizdi aıryqsha baýrady. Keremet áýender eken. Mýzykaǵa elitip, biraz demalyp otyrdyq. Bul da júregimizde qalatyn ádemi estelik boldy.
Nuraı SÁLIBAEVA, Shymkent:
– Biz apaly-sińliler bolyp EKSPO kórmesin aralap júrmiz. Bul degenińiz eki aınalyp kelmeıtin keremet jahandyq shara ǵoı. Sondyqtan, júreginde Otanyna degen mahabbaty bar árbir adam osy kórmege kelip, kórýi tıis dep oılaımyn.
Búgin ekinshi kún kórmeni aralap otyrmyz. Bastapqyda shettegi Reseı, Monaka, Germanııa pavılondaryn araladyq. Bári de tamasha. Pavılondardyń ishine kirseń, álemdi aralaǵandaı bolasyń. Bireý telefon soqsa, «Biz AQSh-ta júrmiz, endi Fransııaǵa baramyz» dep sóıleısiń, keremet emes pe?! Quddy ǵalamshardy aınalyp júrgendeı kúı keship júrmiz. Qazaqtyń atyn dúnıe júzine tanytatyn mundaı iri halyqaralyq sharalar elimizde óte bersin deımin. Bul óskeleń urpaqtyń sanasyna Otanyna degen maqtanysh sezimin uıalatatyny sózsiz. Qazaqtyń basynan toı arylmasyn, elimiz tynysh, besigimiz tek tynyshtyqta terbelsin deımin.
Qymbat TOQTAMURAT,
«Egemen Qazaqstan»
sýretterdi túsirgen
Orynbaı Balmurat,
«Egemen Qazaqstan»
