Basqosý barysynda qalanyń kóshbasshy muǵalimderi ár pánniń ereksheligine jeke-jeke toqtalyp, olardy oqytýdyń jańa ádisterin qalyptastyrý máselesi boıynsha tájirıbelerimen bólisti. Tyń usynystar ortaǵa tastalyp, ár balanyń bilimdi, parasatty zııatker azamat bolyp qalyptasýy úshin olardy jan-jaqty tárbıeleýdiń mańyzy zor ekeni basa aıtyldy.
– Qoǵam jáne adam ómiriniń barlyq damý salalarynda oryn alyp jatqan eleýli ózgerister jaǵdaıynda barshany mekteptegi bilim berý qandaı bolý kerek degen másele tolǵandyrady. Adamzat damýynyń jańa kezeńi aqparattyń, ekonomıkanyń, mádenıettiń jahandanýymen, sondaı-aq aqparattyq qoǵamǵa kóshýmen sıpattalady. Biz eski salalardyń joıylyp, jańa salalardyń paıda bolyp jatqanyn kórip otyrmyz. 2025 jylǵa qaraı álemdik ekonomıkanyń 46 %-y sıfrly ortada bolady dep kútilýde. Qazirgi tańda bul kórsetkish 10 %-dy quraıdy jáne keıbir mamandyqtardyń joıylýyna, basqa mamandyqtardyń paıda bolýyna alyp keledi. Qazir bastaýysh mektepte bilim alyp jatqan balalardyń 65 %-y jumystyń jańa túrlerinde qyzmet etetin bolady. Oryn alyp jatqan ózgeristerdi eskere otyryp, bilim berý salasynda zamanaýı sarapshylar men zertteýshilerdiń kózqarastary kelesige saıady: oqýshylarǵa HHI ǵasyrda kásibı, áleýmettik jáne jeke tabysqa jetý úshin qajetti daǵdylardy damytý múmkindigin beretin jańa bilim berý baǵdarlamalary, tásildemeler men pishimder qajet. Jas óskinderge bilim berý mazmunyn qaıta qarastyrý mańyzdylyǵy álemniń jetekshi elderiniń qatysýymen ótetin halyqaralyq deńgeıde tanylǵan alańdarda da talqylanyp júrgen másele. Sondyqtan, ustazdarymyz bilim berý taktıkalaryn árqashan jetildirip, jandandyryp otyrýy qajet deıdi Nazarbaev zııatkerlik mektebiniń tárbıe jumysy jónindegi zertteýler dırektory Alma Myrzashqyzy.
Tálimger tilge tıek etkendeı, Máskeý basqarý mektebi men Reseı Federasııasynyń strategııalyq bastamalar agenttigi ázirlegen mamandyqtar atlasynda da tipti bizdiń oıymyzǵa kirmegen jańa mamandyqtar paıda bolatyny aıtylady. Mundaǵy talqylanǵan taǵy bir másele, oqýshylardy kún sanap qaryshtap damyp kele jatqan sıfrly tehnologııalardy ıgerýge beıimdeý boldy. Olardy sandyq quzyretter boıynsha tárbıeleý, jumys isteýge daıyndyq jáne jaǵymdy áleýmettik qarym-qatynas úshin praktıkalyq daǵdylarǵa jeteleıtin azamattyq qundylyqtardy jáne sıfrly álemde birtektilikti qalyptastyrýdan bastaý qajet ekendigi basa aıtyldy.
– Oqýshylar 7-synyptan bastap «Fızıka», «Geografııa», «Hımııa», «Bıologııa» pánderin meńgeretinin atap ótken jón. Bastaýysh mektepten bastap jaratylystaný-ǵylymı pánderdiń mazmunyn osylaı qurylymdaý pánaralyq kiriktirýdi is júzinde júzege asyrý múmkindigin beredi. Oqýshylardyń júktemesin azaıtý maqsatynda muǵalimder kiriktirilgen tapsyrmalardy úı tapsyrmalary retinde ázirleı alady. Atalǵan pánder boıynsha kiriktirilgen jobalyq jumystardy oryndaý oqýshylardyń STEAM-bilim berý ınjenerlik, synı jáne shyǵarmashylyq oılaý qabiletiniń damýyna yqpal etetin bolady, – deıdi geografııa pániniń muǵalimi Máýlen Teleýbaev.
Bilim berý salasynda áli de aqsap jatqan máseleler men ózekti saýaldar da basqosýda aıtylmaı qalǵan joq. Olardy sheshý joldary men bilim berý sapasyn arttyrýdyń jańa baǵyttaryn qalyptastyrý qajettigi sóz boldy. Jıyn sońynda Nazarbaev zııatkerlik mektebiniń bilikti ustazdary arnaıy sheberlik saǵattaryn ótkizip, tájirıbelerimen bólisti.
Arman OKTIаBR,
«Egemen Qazaqstan»
ALMATY
