Ortalyq ǵylymı kitaphana sırek kitaptar qorynyń bas kitaphanashysy Aınur Nurǵazıeva kórmege eń qundy kitaptar men qoljazbalardyń ákelingenin aıtty. «Bular mońǵol, shaǵataı, parsy, nemis tilderinde arab, latyn grafıkalarymen basylǵan dúnıeler. «Qazaq» gazetiniń 1913 jyly shyqqan 7-shi sany, «Aıqap» jýrnalynyń 1912 jyly shyqqan 5-shi sany, Ahmet Baıtursynulynyń 1925, 1914 jyldary shyqqan «Til-qural», «Álipbı» kitaptary, Muhtar Áýezovtiń Abaıdyń ómiri men shyǵarmashylyǵyna arnaǵan qoljazbasy, Máshhúr Júsiptiń qoljazbasy qyzyǵýshylyq týdyrady dep oılaımyn. Kórmede HIH ǵasyrdaǵy Quran kitaby da tur. Jalpy, bizdiń sırek qordaǵy Quran kitaptarynyń barlyǵy da HIH ǵasyrda shyqqan dúnıeler. Jurtshylyq úshin tyń dúnıeniń biri – Aqsaq Temirdiń tarıhy týraly belgisiz avtordyń shaǵataı tilinde jazǵan qoljazbasy. Buny zertteý, qazaq tiline aýdarý – sırek qordyń aldaǵy jumys josparyna engizildi» dedi ol.
Sondaı-aq kórmege fransýz ekspedıtory Gýstav Levonnyń, Radlovtyń kitaptary, Alekseı Harýzın esimdi avtordyń «Kırgızy Býkeevskoı Ordy» kitaby, túsindirme sózdikter de qoıylǵan. Osynyń ishinde Harýzınniń Bókeı Ordasyndaǵy halyqtyń antropologııalyq erekshelikteri, jasy, boıy, salmaǵy týraly eńbegin atap aıtýǵa bolady. Munda Ordadaǵy sol kezeńdegi halyq sany adamdardyń jas shamasy boıynsha bólip-bólip kórsetilgen. Jalpy, kórmege 28 kitap pen qoljazba ákelinipti. Al, kitaphanadaǵy sırek kitaptar qorynda 300 myńnan asa kitap bar. 1940 jylǵa deıin shyqqan kitaptardyń barlyǵy da sırek kitaptar qoryna alynǵan.
Aıgúl Seıil,
«Egemen Qazaqstan»
Sýretti túsirgen
Orynbaı BALMURAT
«Egemen Qazaqstan»
