«Elge el qosylsa − qut» demekshi, Altaıdaǵy aǵaıyn Alataý baýraıynan kelgen qos otbasyn jyly ráýishpen qushaq jaıa qarsy aldy. «Altaı degen qasıetti jer ǵoı. Munda kóship kelgenimizge qýanyshtymyz. Qolymda eki ulym bar. Jumys jaǵy jýyq arada sheshilip qalatyn shyǵar dep úmit etip otyrmyz. Eldiń ishi ǵoı», deıdi osydan bir aıdan astam ýaqyt buryn Almaty oblysynyń Eskeldi aýylynan kóship kelgen Káken Sherı.
Qos otbasy da qazir memleketten kómek alý úshin qujattaryn jınastyryp jatqan kórinedi. Qytaıdyń Altaıynda dúnıege kelgen, atajurtqa oralǵanyna 13 jylǵa jýyqtaǵan Káken Sherı qujat jaǵy rettelgenshe qol qýsyryp qarap otyrmaıyq dep uldarymen birge jol shetine kıiz úı tigip, ótken-ketken jolaýshylarǵa qymyz satýdy qolǵa alypty. Aldaǵy ýaqytta kıiz úı ishinen shaıhana ashyp, aýdandaǵy týrızmniń damýyna úles qospaq oıy bar. «О́zim balalyq shaǵymdy ótkergen, ósip-óngen Qytaıdyń Býyrshyn aýdanynda týrızm jaqsy damyǵan. Áıgili Qanas kóli de sol mańda. Munda jylyna 20 myń týrıst keledi. Joldyń boıy qujynaǵan halyq. Bıe baılaıdy, ulttyq buıymdar satady, ulttyq taǵamdar ázirleıdi. Katonqaraǵaıdyń tabıǵaty ol jerden asyp túspese kem emes. Bul jerge de jylyna jıyrma myń adam kelip tursa aýdan bıýdjetine salyq túser edi ǵoı. Kórgenimdi aıtyp otyrmyn. Sol jaqtan keldim ǵoı. Katonqaraǵaıdyń shekaraǵa taqaý aýyldarynda halyq sany azaıyp barady dep estımin. Túsinbeımin, mynadaı jerdi qalaı tastap ketýge bolady? Batystan, basqa elderden qanshama adam osy Altaıdyń bir jutym aýasyn jutýǵa zar bolyp kelip jatqan joq pa? О́mir súrgennen keıin osyndaı jerde súrý kerek qoı. Qysy bolmasa, Altaı ǵajap jer ǵoı», deıdi ol.
Jetisýdan kóship kelgen ekinshi otbasynyń 5 balasy bar eken. Sonyń úsheýi mektep jasynda kórinedi. Jastarynan jasamysy kóp, shekara shebindegi Belqaraǵaı aýylynyń turǵyndary eldi mekendegi bilim ordasynyń úsh oqýshymen tolyǵatynyn jaqsylyqqa balap otyr. Otaǵasy Aıdynbek Jylaı Qytaıda mal dárigeri bolyp eńbek etipti. «Biz de Qytaıdyń Altaıynda turǵanbyz. Shynyn aıtqanda, Jetisýdyń aýa raıyna úırene almadyq. Taýda týyp, taýda óskenbiz ǵoı. Bizge osyndaı tabıǵat unaıdy», deıdi bes balanyń ákesi.
Belqaraǵaıǵa qonys aýdarǵan turǵyndardyń jaǵdaıymen bizben birge tanysqan Katonqaraǵaı aýdany ákiminiń orynbasary Renat Qurmambaev qos otbasynyń ár múshesine memleket tarapynan 70 myń teńge kóleminde qarjylaı kómek kórsetiletinin, bul jerde qandaı kásippen shuǵyldanýǵa bolatyndyǵyn aıtyp, óziniń aqyl-keńesterin berdi. «Biz sizderge jumys taýyp berýge járdemdesemiz. Katonqaraǵaıǵa kelimdi-ketimdi kisi kóp. Sondyqtan kıiz úı tigip, týrızm salasyn órkendetpek oılaryńyzdy quptaımyz. Qymyzdan bólek, ulttyq buıymdar jasap, týrısterge satýlaryńyzǵa da bolady», – degen aýdan ákiminiń orynbasary memlekettiń kómegimen bir aı tegin oqyp, jańa mamandyq ıgerýge de bolatynyn jetkizdi. Oǵan múmkindik bar. Qazirgi ýaqytta oblys ortalyǵy – О́skemennen arnaıy kelgen mamandar kásip ashqysy, mal bordaqylaý alańdaryn qurǵysy keletin azamattarǵa qujat resimdeý, nesıe alý, kepildik qoıý máselelerin jan-jaqty túsindirip, oqytyp jatyr.
Azamat QASYM,
«Egemen Qazaqstan»
Shyǵys Qazaqstan oblysy,
Katonqaraǵaı aýdany
