Eki el arasyndaǵy dıplomatııalyq qarym-qatynas ornaǵaly beri saıası dıalogtar jasalyp, taýar aınalymy kóbeıip, mádenı-gýmanıtarlyq áriptestik keń óris aldy. Elshi Germanııanyń Qazaqstandy talaı márte álemdik arenada qoldaǵanyn aıtty.
«Germanııa elimizdiń Eýropadaǵy qaýipsizdik jáne yntymaqtastyq uıymynyń sammıtine tóraǵalyq etýin, EKSPO-2017 halyqaralyq kórmesin ótkizýin quptap, Dúnıejúzilik saýda uıymy quramyna kirýge yqpal jasady. Qazaqstan da óz kezeginde nemisterdiń BUU Qaýipsizdik Keńesiniń turaqty músheligine ótýin tolyq qoldaıdy», – dedi Bolat Núsipov.
Qazaqstan men Germanııa arasynda túrli deńgeıdegi dıplomatııalyq qatynastar jolǵa qoıylǵan. Máselen, 2016 jyly eki taraptyń delegasııalary ózara 39 márte issaparǵa shyqqan. Bıyldyń ózinde 25 ret saıası jıyn ótkizilipti. Oǵan qosa, «býndes eldiń» prezıdenti Frank-Valter Shtaınmaıer bıyl Qazaqstanǵa resmı saparmen kelip, EKSPO-2017 halyqaralyq kórmesindegi nemis kúnderiniń ashylý saltanatyna qatysty. Germanııa basshysynyń osy sapary nátıjesinde quny 1 mıllıard dollarlyq 21 jobany iske asyrý jónindegi ekijaqty kelisimge qol qoıyldy.
Elshiniń málimetterine súıensek, Qazaqstan men Germanııa arasyndaǵy saýda jáne ekonomıkalyq baılanys ta qarqyn alyp keledi. 2016 jyly eki el arasyndaǵy taýar aınalymy 4 mıllıard eýrony qurasa, bıylǵy 5 aıdyń ózinde 2,1 mıllıard eýroǵa jetken. Bul ótken jylǵy osy ýaqytpen salystyrǵanda 36 paıyzǵa kóp. Bolat Núsipov bıyl saýda jáne ekonomıkalyq qatynastyń aýqymy 45 paıyzǵa ósetinine senimdi ekenin málimdedi.
Investısııa salasynda da qarqyndy ilgerileýshilik baıqalady. 2005-2016 jyldar aralyǵyndaǵy Germanııanyń elimizge quıǵan qarjy kólemi 4 mıllıard dollardy quraǵan. Elshiniń aıtýynsha, bul úlken soma emes, alaıda, ınvestısııanyń basym bóligi ónerkásip salasyna baǵyttalǵan. Sonymen qatar, buryn Qazaqstanda turǵan nemisterdiń kóbi elimizde óz kásibin ashýdy jón sanaıdy eken.
«Qazaqstannan Germanııaǵa kóship barǵan nemister eki el arasyndaǵy kópir ispetti. Olardyń keıbiri elimizge oralyp, kásipterin ashyp jatyr. Tipti Germanııada da tabysqa jetkenderi bar. Mysaly, buryn Qazaqstandy meken etken Karın Shtrens búginde Býndestagtyń depýtaty», dedi Bolat Núsipov.
Elshi Germanııada ómir súrip jatqan qazaqtarǵa da toqtaldy. Onyń aıtýynsha, Bethoven men Geteniń otanynda myńǵa jýyq qandasymyz turady. Elde qazaqtarǵa arnalǵan 3 mádenı mekeme bar. Bolat Núsipov nemis elindegi qandastarymyzdy árdaıym qoldap otyratynyn jetkizdi. Máselen, elshiliktiń qoldaýymen 2011 jyly Kopengagende, 2014 jyly Berlınde, 2016 jyly Kelnde qazaq dıasporalarynyń Kishi quryltaıy ótti. Sondaı-aq, 2014 jyldan beri elshiliktiń janynan qazaq tilin úıretý kýrsy ashylǵan.
Abaı Asankeldiuly,
«Egemen Qazaqstan»
