Senbiniń keshinde qala turǵyndary men qonaqtary Medeý shatqalyn betke aldy. Alataýdan esken salqyn samalmen tynystap, ásem ánge terbelsek dep kelgenderdiń sany úsh myń adamnan asyp jyǵyldy. Eki kún boıy arý Almatyny ánmen sýsyndatqan óner ıeleri arasynda Qytaı, Túrkııa, Japonııa, Koreıa, Indııa elinen kelgen án óneriniń juldyzdary, naqtyraq aıtsaq, ońtústik koreıalyq «U-KISS» K-pop toby, Indııalyq ánshi Sanah Moidutty, túriktiń juldyzy Murat Boz syndy álemge áıgili ánshiler sahna kórkine aınaldy. Álemniń 118 memleketiniń telearnalary arqyly taratylǵan festıvalde sheteldik oryndaýshylarmen qatar otandyq óner ıeleri de óz ónerlerin ortaǵa saldy. «Dos-Muqasan», «MýzART», Qaırat Nurtas, Mádına Sádýaqasova, Kamshat Joldybaeva, Álı Oqapov, Erke Esmahan, Súndet Baıǵojın, Zarına Altynbaeva, Marjan Arapbaeva, Álisher Karımov, Roya, Ademi, Aıýmı, Renzo, Black Dial syndy tanymal toptar men jeke oryndaýshylar kórermen yqylasyna bólendi.
– Arý qalamyzda aýqymy keń shyǵarmashylyq shara ótýde. Ol burynǵy «Azııa Daýsynyń» jalǵasy ispetti kórinedi. Búgin biz sol bir kezderi án aıtqan oryndaýshylardy eske alyp, zamanaýı ánshilerdi tyńdaýdamyz. Bul festıval aldaǵy ýaqyttarda da jalǵasyn tabady degen senimdemin. О́nerdi baǵalap kelgen barsha tyńdarmandarǵa alǵys bildiremin – deıdi ánshi Medeý Arynbaev.
Konsert barysynda pırotehnıkalyq, lazerlik qondyrǵylar, jaryqdıotty konstrýksııalar, ekrandar, LED-fakelderi, jyljymaly sahna utymdy paıdalanyldy. Sport motosıklderine mingen kaskaderler, gımnast sheberleri, balet ártisteri, sımfonııalyq orkestr jınalǵandarǵa erekshe mereke syılady.
Uıymdastyrýshylardyń aıtýynsha: Medeýde radıaldy formadaǵy sahna alǵash ret qoıylyp otyr. «Bul formanyń tehnıkalyq nıýansy óte kúrdeli, sondyqtan elimizde mundaı sahnalar jasalmaıdy. Avtorlyq joba Germanııadan, Reseı men Ýkraınadan kelgen áriptester arqyly júzege asty. Búgingi kesh barysynda portaldardaǵy vertıkaldy ekran kórermender men ánshilerdi de tamsandyrdy» deıdi sharany uıymdastyrýshylar.
Osylaısha, eki kún qatarynan almaty aspanyn ánge bólegen mereke kópshiliktiń kóńilinen shyqty. Aldaǵy kúz aılarynda da qala turǵyndary men qonaqtaryna 70-ten astam mádenı-saýyqtyrý sharalar usynylady, olardyń arasynda tyń jobalarmen qosa dástúrli festıvalder men konsertter de bar. Qala qonaqtary «Kók-Tóbe-Opera» halyqaralyq mýzyka festıvaline baryp, ashyq aspan astynda «Orkestrler sherýin», «Alma fest» alma festıvalin tamashalap, «ToıQazan 2017» atty Qazaqstan halyqtarynyń ulttyq as mázirleri festıvalinen dám tatyp, «Gakku daýsy» kópmyńdyq Open Air di qyzyqtap, «Tulpar» ulttyq kınosyılyǵyn tapsyrýǵa qatysyp, Ǵ. Músirepov atyndaǵy jastar teatrynyń «Bazarym tarqamasyn» spektaklin jáne basqalaryn tamashalaı alady. «Almaty Sales Festival: Summer 2017» jeńildik festıvali aıasynda qalanyń 100-den astam saýda ortalyqtary arzan taýarlaryn usynady.
Arman OKTIаBR,
«Egemen Qazaqstan»
ALMATY
