Sharanyń resmı bóliminde Senegal seksııasynyń komıssary Djop Malık sóz sóılep, kórmege qatysýdaǵy basty maqsattaryn áńgimeledi. «Biz de álem elderimen birge jańartylatyn energııa kózderin tutynýǵa járdemdesýge nıettimiz. Jańǵyrmaly energııa kózderi qorshaǵan ortanyń lastaný deńgeıin tómendetýge jáne Senegaldyń damý josparynyń quramdas bóligi bolyp keletin halyqtyń elektroenergııa shyǵyndaryn qysqartýǵa múmkindik beredi.
Batys Afrıkada ornalasqan memleketimiz 2035 jylǵa qaraı damýshy elder qataryna kirýdi josparlaýda. Senegal Respýblıkasy damýynyń basty baǵyttarynyń biri –energetıkalyq táýelsiz el bolý», dedi ol.
Mamandardyń málimetinshe, Senegal úkimeti bıyl qaıta jańǵyrtylatyn energııa kózderine degen qarjyny 20 paıyzǵa deıin ulǵaıtýdy kózdegen eken. Ásirese kún jaryǵy men jelden óndiriletin energııalarǵa kóp kóńil bólingen. Onda qazirdiń ózinde qýaty 72 MVt quraıtyn úsh kún elektr stansasy bar. Bolashaqta bul qurylǵylardy kóbeıte túspek. Jospar boıynsha olardyń jalpy qýat mólsheri 350 MVt-qa jetý kerek. Bul Dúnıejúzilik banktiń qoldaýymen júzege asyrylady.
Respýblıkada jalpy qýaty 175 MVt bolatyn eki jel parkiniń qurylysy júrýde. Onyń biri «Taba ndeı» dep atalatyn 150 MVt-tyq jel parki. Ol Batys Afrıkadaǵy elektr qýatyn óndiretin eń iri nysan bolady. Sondaı-aq bıotehnologııa óndirisi jaqsy damyp, jolǵa qoıylǵan. Olardyń kómegimen elde 10 myń tonna etıl spırti, bıootyn bolyp esepteletin 35 myń tonna materıal shyǵarylady. Ol banannyń qabyǵynan, ıaǵnı ekologııalyq taza zattan ázirlenedi. Al jańǵaqtyń qabyǵy men júnnen ǵımarattardy jylytýǵa qoldanylatyn qurylys materıaly jasalady.
Senegal – gıdroenergetıkasyn da jaqsy damytqan memleket. Munda energetıkalyq qýaty 200 MVt bolatyn «Manantalı» atty gıdroelektr stansasy jumys isteıdi. Ol óndirgen energııanyń 33 paıyzy senegaldyqtardyń ıgiligine jumsalady eken.
Ashat Raıqul,
"Egemen Qazaqstan"
