Aǵymdaǵy jyly úsh óńirde, atap aıtqanda, Semeı, О́skemen jáne Kókshetaý qalalarynda ornalasqan Nazarbaev zııatkerlik mektepteri Halyqaralyq mektepter keńesiniń (CIS) akkredıtteýinen ótti. CIS – bilim salasyndaǵy sońǵy jańalyqtar men joǵary standarttardy odan ári ilgeriletý úshin qurylǵan álemdegi tanymal uıymdardyń biri. Qazirgi ýaqytta beldi klýbtyń músheligine kóptegen memlekettiń aldyńǵy qatarly ozyq mektepteri men oqý keshenderi engen. Uıym álemniń úzdik 50 ýnıversıtetimen yntymaqtastyq ornatqan. Bul ýnıversıtetter akkredıttelgen mektep túlekterin oqytýǵa múddeli. CIS sertıfıkattaryn mektep jetekshilerine Bilim jáne ǵylym mınıstrligi Mektepke deıingi jáne orta bilim berý departamentiniń dırektory Sholpan Karınova, Nazarbaev Ýnıversıtetiniń prezıdenti Shıgeo Katsý jáne «Nazarbaev zııatkerlik mektepteri» DBBU basqarma tóraıymy Kúlásh Shámshıdınova saltanatty túrde tabys etti.
Jalpy, zııatkerlik mektepterdiń jańa mártebesi pedagogıkalyq ujym men oqýshylar úshin jańa múmkindikterge jol ashpaq. Mamandardyń aıtýynsha, atalǵan akkredıtteýden ótý úderisi uzaq ýaqyt boıy jan-jaqty jumys júrgizýdi qajet etedi, sondaı-aq, mektepte tikeleı ınspeksııa júrgizilgennen keıin aıaqtalady. Anglııa, Germanııa, Reseı, Ázerbaıjan, Iordanııa, AQSh jáne basqa da memleketterdiń ókilderinen quralǵan CIS-tiń bedeldi toby kóktemde Semeı, О́skemen jáne Kókshetaý qalalarynda mektepterdiń menedjmentin, muǵalimderdiń kásibı oqytý mashyǵyn, oqytý prosesin uıymdastyrý men jalpy mektep ómirin saralap, baǵalaýdan ótkizgen bolatyn. Osylaısha, halyqaralyq uıym ókilderi mektepterdiń «О́mirlik qundylyqtar», «Oqytý jáne úıretý», «Basqarý jáne kóshbasshylyq», «Kásibı quram jáne tehnıkalyq qyzmetkerler», «Qoljetimdi oqytý men bilim», «Operasııalyq júıeler», sondaı-aq, shet tilderin meńgerý boıynsha barlyq álemdik standarttar talabyna sáıkes keletindigin anyqtady. Osy oraıda Semeı men Kókshetaý qalalaryndaǵy fızıka-matematıka baǵytyndaǵy jáne О́skemen qalasyndaǵy hımııa-bıologııa baǵytyndaǵy Nazarbaev zııatkerlik mektepteriniń dırektorlary, ata-analar komıtetteri men oqýshylar komıtetteriniń jetekshileri sahna tórine kóterilip, jaýapkershilik údesinen tabylǵan ujym men ortalyq apparattyń qoldaýy úshin rızashylyǵyn jetkizdi.
Qazirgi tańda Nazarbaev zııatkerlik mektepteriniń beseýi akkredıtteýden ótti. Jospar boıynsha aldaǵy oqý jylynda taǵy segiz mektep, al 2019 jyly barlyq mektep halyqaralyq akkredıtteýden ótetin bolady. Qazaqstandyq mektepterdiń álemdik deńgeıdegi tańdaýly bilim berý uıymyna múshe bolýy otandyq bilim berý júıesi úshin aıtýly oqıǵa.
«Zııatkerlik mektepterde oqytýdyń nátıjeleri men keleshegi: jańa talaptar, jańa múmkindikter» taqyrybynda ótken bıylǵy Tamyz máslıhatynda jahandyq básekelestik, otbasy men mektep qarym-qatynasyn qalyptastyrý, aldaǵy oqý jylyn tıimdi uıymdastyrý máselelerine nazar aýdaryldy.
– О́zgeriske toly zamanda zııaterlik mektepterdiń aldyna qoıatyn talaptar da ózgerýde. Sondyqtan bolashaǵymyz qandaı bolady, balalarǵa qandaı bilim beremiz degen máseleler keńinen saraptaldy. Tamyz keńesi aıasynda mektep jetekshilerine jáne ata-analar komıtetterine arnalǵan 20-ǵa jýyq seksııa jumystary uıymdastyryldy. Bıyl bizde jańa úrdis bastaý aldy. Mekteptiń joǵary dárejedegi muǵalim-zertteýshileriniń basshylyǵymen shyǵarmashylyq zerthanalar qyzmet etip, oqytýdyń ınnovasııalyq tájirıbesimen bólisti. Iаǵnı, olardyń ozyq tájirıbesi Nazarbaev zııatkerlik mektepteriniń barlyǵyna taratylady. Sondaı-aq, óńirlerden kelgen muǵalimder qaýymy EKSPO kórmesin tamashalap, pavılondardaǵy tyń jańalyqtardy sabaq barysyna paıdalaný baǵytynda jumys júrgizdi, dedi «Nazarbaev zııatkerlik mektepteri» DBBU prezıdenti Kúlásh Shámshıdınova.
Aıta ketken abzal, ótken oqý jylynda Nazarbaev zııatkerlik mektepteriniń oqýshylary matematıka, fızıka, hımııa, bıologııa pánderi boıynsha kóptegen halyqaralyq olımpıadalardyń jeńimpazy atanyp, robotty tehnıka salasy boıynsha mártebeli týrnırlerdiń júldeli oryndarynan kórindi. Máselen, Vashıngton qalasynda 163 memleket qatysqan robot tehnıkasy saıysynda qazaqstandyq jas zııatkerler 8-orynǵa ıe boldy. Oqý granttaryn ıelený boıynsha da mektep túlekteri kósh bastap keledi. Aldyn ala alynǵan aqparattarǵa sáıkes, bıyl 100-ge jýyq oqýshy Nazarbaev Ýnıversıtetine, 80-ge jýyq túlek shetel ýnıversıtetterine oqýǵa tústi.
– Mektepterimizde akademııalyq bilimge, pándik mazmunǵa úlken mán beriledi. Sondaı-aq, shyǵarmashylyqpen aınalysý, synı turǵydan oılaý, problemalardy sheshe bilý sııaqty máselelerge erekshe kóńil bólinedi. Osyǵan oraı, aýqymdy jumystar júrgizilip keledi. Oqý prosesin uıymdastyrýǵa oqýshylar da qatystyrylady. Iаǵnı, balalardyń pikiri men dúnıejúzilik tájirıbeni qatar saralaımyz. Búginde balalardyń bilim deńgeıi óte joǵary. Bul mektepterimizdiń bilim berý deńgeıiniń jáne jumysty uıymdastyrýdyń halyqaralyq dárejede júrgizilýiniń nátıjesi, dedi K.Shámshıdınova.
Dýman ANASh,
«Egemen Qazaqstan»
