Áskerı kafedranyń alǵashqy túlekteri 2006 jyly bitirgen bolatyn-dy. Osydan eki jyl buryn elimizdiń Bilim jáne ǵylym mınıstrliginiń, Qorǵanys mınıstrliginiń kómegimen ýnıversıtette áskerı kafedranyń jumysy qaıta bastaldy. Saltanatty sát te bastalyp, ár stýdent qolyna qarý alyp, Otanyna adal bolýǵa, Otan úshin qyzmet etýge ant berdi. Osy sát ant berýshiler úshin ǵana emes, ant qabyldaý sátin kórýge kelgen stýdentterdiń ata-analary, týystary úshin de mańyzdy, tolqynysqa toly boldy. Stýdentter áskerı ant qabyldaǵan soń, negizgi jeke qurammen sap túzep, saltanatty marshpen júrip ótti. Barlyq jınalǵan qonaqtar úshin olar áskerı kafedranyń ánuranyn oryndap, ózderiniń sońǵy valsterin bılep berdi.
Áskerı is-shara kezinde stýdent Amangeldi Áıtenov Ant qabyldaý rásiminen soń súıikti qyzyna usynys jasady. Stýdentter alańnyń ortasyna shyǵyp, júrek sýretin beıneledi.
Áskerı kafedrada bilim alatyndardyń qataryna qosylý ońaı emes. Eki jyl boıy stýdentter áskerı tártipti, elimizdiń Qarýly Kúshteriniń jarǵylaryn oqyp tanysady. Oqý ornynyń Áskerı sabaq júrgizý kafedrasynyń basshysy, podpolkovnık Sábıt Shyntemirovtiń aıtýynsha, stýdentter sońǵy aıdy Shyǵys Qazaqstan oblysynda ornalasqan №2878 áskerı bóliminde áskerı daıarlyqpen ótkizdi. Atalmysh bólimde olar teorııalyq bilimderin tájirıbede qoldanýdy, atys tehnıkasyn, taktıkalyq jáne ınjenerlik daıarlyqty úırenip, basqa da áskerı-oqý tapsyrmalaryn oryndapty.
Farıda BYQAI,
«Egemen Qazaqstan»
PAVLODAR
