«Astana» fýtbol klýbynyń bas bapkeri Stanımır Stoılov «Seltıkke» qarsy kezdesýden keıin match jaıly pikir bildirdi.
- Menińshe, «Astanaǵa» búkil Qazaqstanǵa naǵyz fýtbol shoýyn syılady dep oılaımyn. Biz alańda báriniń múmkin ekenin kórsettik. Ásirese, ekinshi taımda azdap kambek týraly da armandap ketken kezimiz boldy. Alǵashqy oıyndaǵy nátıje oǵan jetkize qoımady.
- Laslonyń jaǵdaıy týraly oı bildirseńiz.
- Laslo birden aýrýhanaǵa jetkizildi. Jaǵdaıy ázirge belgisiz. Sondaı-aq, Beısebekov te azdap jaraqat alyp qaldy. Kózi isip ketti. Biraq aıqas jaraqatsyz ótpeıtini belgili ǵoı.
- Bul «Astananyń» eń joǵarǵy deńgeıi me, álde «Seltık» nashar oınady ma?
- Menińshe, «Astananyń» eń joǵarǵy deńgeıi osy. «Seltık» te senimdi túrde keldi. Biraq ekinshi taımda qarsylas komanda dál osy baǵytta órbıdi dep kútpegeni anyq. Birinshi taımda shabýylshylarymyz joǵary deńgeıde qysym jasamaǵandyqtan kóp nárseni paıdalana almadyq. Ekinshi 45 mınýtta syzbanusqamyzdy ózgerttik. Jigitterge qyzýqandylyq qosyldy, jıi qysymǵa aldyq.
- «Astananyń» úsh qorǵaýshy ádisine aýysqannan keıin oıyn jaqsy baǵytta órbidi. Aldaǵy ýaqytta osyǵan kóshýi múkin be?
- Qajet kezderde bolmasa «Astana» úsh qorǵaýshymen ylǵı oınaıdy dep aıta almaımyn.
Osy oıynnan keıin Patrık Tvýmasıge qyzyǵýshylyq tanytatyn komandalar kóp bolyp, «Astanadan» ketýi múmkin dep oılamaısyz ba?
- Men osyǵan deıin biraz mańyzdy oıynshylarymnan aıyrylǵanmyn. Biraq ketken oıynshylardyń ornyn laıyqty jigitter kelip basty. Eger klýb qandaı da bir oıynshynyń ketýi týraly sheshim qabyldasa, kelisýge týra keledi. Endigi oıymyzdy Eýropa lıgasyna bólýimiz kerek.
- «Astana» «Seltıktiń» 40 oıyn utylmaı kele jatqan serııasyn buzdy. Eger ekinshi oıyn Glazgoda ótkende bári basqasha baǵytta bolýy múmkin be edi? Sonymen qatar, Eýropa lıgasynyń jerebesinen ne kútesiz?
- «Seltıkti» jeńý ońaı emes. Osyndaı alpaýyt komandadan basym túskenimizge qýanyshtymyz. Al Eýropa lıgasynda osal qarsylas joq. Komandadan tek jeńis kútetinin jigitter biledi dep oılaımyn. Bizdi Eýropa lıgasynda da óte aýyr oıyndar kútip tur.
- «Astanamen» kelisimshartyńyz osy qysta aıaqtalady. Ony sozýdy josparlap otyrsyz ba?
- Bul týraly qazir aıtatyn ýaqyt emes sııaqty. Ýaqyty kelgende kórermiz.
- Alǵashqy oıynda psıhologııalyq turǵyda daıyn Nenad Erıch turýy kerek edi dep ókinbeısiz be?
- Bári aıaqtalǵannan keıin ótkenge ókinýdiń esh máni joq. Meniń qaramaǵymda eki birdeı joǵary deńgeıli qaqpashy bar. Ekeýi de jaqsy deńgeıde. Al Aleksandr Mokınnen eshqandaı qobaljýlyqty baıqamadym. Alǵashqy oıyndaǵy nátıje ol ótkenniń enshisinde qaldy.
Aıta keteıik, Chempıondar lıgasynyń pleı-off kezeńiniń jaýapty oıynynda «Astana» óz alańynda Shotlandııanyń «Seltık» komandasyn qabyldap, 4:3 esebimen jeńiske jetti. Alaıda, qos matchtyń qorytyndysy boıynsha shotlandııalyq ujym Chempıondar lıgasynyń toptyq kezeńine joldama aldy. Glazgoda ótken oıynda elordalyqtar 0:5 bolyp ese jibergen bolatyn.
Aıan ÁBDÝÁLI,
«Egemen Qazaqstan»
