Buǵan deıin BUU Qaýipsizdik Keńesi (QK) biraýyzdan Koreı Halyq Demokratııalyq respýblıkasyna jańa ekonomıkalyq sanksııalar qoldaný týraly qarar qabyldaǵanyn jazǵan bolatynbyz. QK-nyń Turaqty emes múshesi bolyp tabylatyn Qazaqstan ókili de bul sanksııany qoldap daýys bergen. Biraq jańa sanksııalar da KHDR basshylyǵynyń arynyn basa almady. Ol qurlyqaralyq ballıstıkalyq zymyrandardy synaqtan ótkizýdi jalǵastyra beretinin málimdegen bolatyn.
Bul zymyrandardyń AQSh aýmaǵyna deıin jetetini de aıtylǵan. Eger osy zymyrandarǵa ıadrolyq oqtumsyqtar qondyrylsa, ol ǵalamdyq soǵystyń otyn tutatýy múmkin. Bul barlyq adamzatty, sonyń ishinde qazaqstandyqtardy da alańdatatyny sózsiz.
Kıkiljińge otqa maı quıǵandaı áser etken AQSh pen Ońtústik Koreıanyń kesheden beri bastalǵan birlesken áskerı oıyndary. Bul oıyndar on bir kúnge sozylyp, oǵan AQSh-tyń 17 myńnan, Ońtústik Koreıanyń 50 myńnan artyq soldattary men ofıserleri qatystyrylady. Sonymen birge, bul oıynǵa Aýstralııa, Kanada, Kolýmbııa, Danııa, Jańa Zelandııa, Nıderland jáne Ulybrıtanııa elderiniń áskerleri de tartylǵan. Sóıtip, búgingi tańda bar álemniń nazary osy problemaǵa aýyp tur. Álemdik aqparat quraldary áskerı oıyndardyń bastalyp ketkenin jarysa jazyp jatyr. KHDR taraby sabasyna túskendeı bolyp, ázirshe bul arada salqynqandylyq kórsetýde. Kım Chen Yn ıadrolyq synaqtar toqtatyla turatynyn aıtty. Tramp ony durys sheshim dep jarııalady.
Biraq ol sheshimniń qanshalyqty uzaqqa barary belgisiz. Iаdrolyq qarýǵa qol jetkizgen bul eldiń aldaǵy ýaqytta qandaı baılamǵa barary boljalsyz ekenin barlyq álem biledi.
Jaqsybaı SAMRAT,
«Egemen Qazaqstan»
