Typ-tynysh, jaıbaraqat, sabyrly, baıypty, sup-sýyq degen uǵymdar Eriktiń shyǵarmashylyǵyna múldem jat. Jıyrmanyń jetisine shyqqan albyrt jastyń otty sezimderi men ómirge qushtarlyǵynan, ishki álemi men syrtqy tirshilikti úılestirý barysyndaǵy talpynysynan osyndaı jandy dúnıeler týatyn sııaqty. Sýretshimen elordada ótken Dúnıejúzi qazaqtarynyń V quryltaıynda tanysqan edik. О́zbekstandyq jas sýretshi Erik Qulmanov búginde Tashkent oblysyna qaraıtyn Bostandyq aýdanynda turady. Qazaǵy kóp sol aýdannyń týmasy. Orta mektepte beıneleý óneri, syzý pánderinen sabaq beredi. Tashkentte, sondaı-aq, aýdanda da sheberhanasy bar. Bos ýaqytyn kóbinde sol jerlerde ótkizedi eken. О́zbekstan kórkemsýret akademııasynyń múshesi, О́zbekstan Ulttyq kórkemsýret jáne dızaın ınstıtýtynyń túlegi, birneshe báıgelerde sýyrylyp shyǵyp, ózine buıyrǵan syılyqtardy alyp júrgen Eriktiń elimizge bul birinshi ret kelýi emes. О́zbekstandaǵy qazaq mádenı ortalyǵynyń qoldaýymen Qazaqstanǵa birneshe ret kelgen.
«Dúnıejúzi qazaqtary qaýymdastyǵy uıymdastyratyn óner festıvaldaryna qatysyp júrmin. Birinde ekinshi, birinde úshinshi oryn aldym. О́zbekstanda uıymdastyrylatyn báıgelerden de syrt qalǵan emespin. Kórmelerge qatysamyn. Bala kúnimnen tańdaǵanym osy jol bolǵan soń, beıneleý óneriniń shyńyna shyqqym keledi», deıdi jas sýretshi.
Ol orta mektepte oqyp júrgende-aq sýret salýmen aınalysa bastaǵan. Búginde bul salada jumys istemese de ákesi Nesip Qulmanov ta mamandyǵy boıynsha sýretshi. Ákeniń daryny qan arqyly balaǵa berilýinde de, ol jalǵastyrmaǵan joldy ári qaraı uldyń jalǵap áketýinde de bir tylsym bar shyǵar? Bul kúnde yntasy men talaby bar balalarǵa sýret salýdyń qyr-syryn úıretip júrgen ol sýret óneriniń birneshe janrynda eńbektenýde. Van Gog, Klod Mone, Gogen syndy dúnıe júzine tanymal sýretshi bolýdy armandaıdy. Postımpressıonızm baǵytynda izdenip júrgen Erik Qulmanov jeke kórmesin ótkizýge daıyndyq ústinde ekenin aıtty. Osy kúnge deıin salǵan kartınasy 1000-nan asyp ketkenimen, kórmelerde, sheberhanalarda qoldan-qolǵa ótip, kóbi satylyp ketken. Eriktiń aıtýynsha, Tashkentte kartınalarǵa qyzyǵýshylyq ta, suranys ta barshylyq. Bul oǵan shabyt beredi. Alystan qol bulǵaǵan aıaýly armandaryna talpyndyrady. Tek endi jeke kórmesiniń ýaqyty uzap ketpese boldy.
Aıgúl SEIIL,
«Egemen Qazaqstan»
