Baspasóz máslıhatyna elimizdiń Investısııalar jáne damý mınıstrliginiń Investısııalar jónindegi komıteti tóraǵasynyń orynbasary Larısa Jumaǵalıeva, Polsha Respýblıkasynyń Kásipkerlikti damytý agenttigi tóraǵasynyń orynbasary Nına Dobjynskaıa, EKSPO-2017 kórmesindegi Polsha seksııasynyń bas komıssary Andjeı Stefanskıı men Polshanyń Qazaqstandaǵy Elshiliginiń ókili Tomash Zapalskıı qatysty.
Qyrkúıektiń 6-7 kúnderi «Astana EKSPO-2017» halyqaralyq kórmesinde Polshanyń Ulttyq kúni ótedi dep belgilengen. Soǵan oraı Qazaqstan-Polsha bıznes-forýmyn ótkizý de josparlanǵan. Bul jalpy Qazaqstan-Polsha kásipkerleriniń ekinshi forýmy. Birinshisi byltyr Varshavada Qazaqstan Prezıdentiniń Polshaǵa memlekettik saparynyń aıasynda ótken bolatyn. Ol forýmnyń nátıjesi ekijaqty saýda-ekonomıkalyq jáne ınvestısııalyq yntymaqtastyqty aıtarlyqtaı jandandyrýǵa mol múmkindik ashty.
Polsha Damý mınıstrliginiń málimetinshe, 2017 jyldyń alǵashqy jartyjyldyǵynda ekijaqty taýar aınalymy 601,9 mln eýrony qurap, 2016 jyldyń sáıkes kezeńimen salystyrǵanda, 75 paıyzǵa ulǵaıǵan. Qazaqstandyq eksport 90 paıyzǵa artyp, 389,1 mln eýrony, al Polsha ımporty 54,5 paıyzǵa ósip, 212,8 mln eýrony quraǵan.
Brıfıngke qatysýshylar forýmdy uıymdastyrý jańa ekonomıkalyq yntymaqtastyqtyń baǵyttaryn talqylaýǵa, sonyń ishinde birlesken jobalardy damytý jaǵdaıy, sondaı-aq, iskerlik baılanystardy odan ári keńeıtý, ekonomıkalyq ózara árekettestiktiń deńgeıin keńeıtip, Qazaqstanǵa polıak ınvestısııalaryn kóptep tartýǵa múmkindik beretinin basa aıtty.
Polsha Astanadaǵy EKSPO-2017 kórmesine de belsene qatysýda. «Bolashaq energııasy» atty polıak pavılony zamanaýı kómir tehnologııalary, óndirýdiń jasyl tehnologııalary, elektr energııasy men bıomassany óndirý, sondaı-aq, energetıkalyq naryqty sıfrlandyrý túrinde usynylǵan. Aıtqandaı, aldaǵy EKSPO-2022-ni ótkizý quqyǵyna polıaktiń Lodz qalasy úmitker. Astananyń sátti tájirıbesin eskere otyryp, bas komıssar A.Stefanskıı bolashaqta qazaqstandyq jáne polshalyq taraptar arasynda EKSPO kórmesin ótkizý boıynsha keńester uıymdastyrýdy josparlap otyrǵanyn atap ótti. Sondaı-aq, 7 qyrkúıekte EKSPO-2017 kórmesi barysynda Polsha prezıdentiniń qatysýymen Polsha Ulttyq kúnine arnalǵan saltanatty sharalar ótkizý kózdelgen. «Astana Balet» teatrynda gala-konsert, Polsha Úlken teatrynyń qoıylymy men basqa da sharalar ótkizý josparlanýda.
Dınara BITIK,
«Egemen Qazaqstan»
