Sharany oblystyq Tilderdi damytý basqarmasy uıymdastyrdy. «Dóńgelek ústel» májilisiniń sheńberinde qostanaılyq til mamandary qazaq tilin úıretýdiń tehnologııasy men ádistemeleri, sheberlik sabaqtary kórsetti.
Negizi Qostanaı oblystyq tilderdi damytý basqarmasy bul jumysty 2009 jyldan júrgizip keledi. Basqarmanyń tilderdi úıretý ortalyǵy shetelde turatyn qazaqtar úshin ana tilin úıretýdiń arnaıy baǵdarlamasyn jasaǵan bolatyn, ony segiz jyldan beri reseılik qazaqtar paıdalanyp keledi. Bul joly sheberlik sabaqtaryna Chelıabi oblysynyń birneshe aýdandarynan 10 muǵalim kelip qatysty. Olardyń barlyǵy da ózderiniń turǵylyqty jerlerindegi mektepterde qazaq balalarǵa ana tilin fakýltatıvtik sabaqtar júrgizý arqyly úıretedi.
«Men Chelıabi qalasyndaǵy stýdentterge birneshe jyldan beri ana tilin oqytyp kelemin, bizdiń ózimiz de ana tilin nashar bilemiz. Biraq jastardyń da, ózimizdiń de qazaq tiline degen yntamyz joǵary dep aıta alamyn. Sabaq úzbeı ótkiziledi. Til joǵalsa bizge ult retinde de qaýip ekenin túsingenbiz. Qazaqtyń dástúrlerin saqtaýǵa tyrysamyz» deıdi Iýlıt Baıdáýletova.
«Dóńgelek ústel» májilisi sheńberinde reseılik muǵalimderge qostanaılyq til mamandary Sandýǵash Ǵubaıdýllına, Dmıtrıı Romashenko oıyn arqyly júrgiziletin sheberlik sabaqtaryn, ozyq ádistemelerin kórsetti. Chelıabilik muǵalimderge ozyq ádistemelik baǵdarlamalar kóshirilip berildi. Muǵalimderge sertıfıkattar tabystaldy. Mundaı jumysty Tilderdi damytý basqarmasy jylsaıyn jalǵastyryp keledi. «Barmasań-kelmeseń jat bolarsyń» degendeı, reseılik qandastarymyz Qostanaı qalasynyń kórikti jerlerin aralady.
Názıra Járimbet,
«Egemen Qazaqstan»
QOSTANAI
