Mundaı qadam qylmystyq tekserý barysynda adam bostandyǵy men quqyǵyn qorǵaý maqsatynda josparlanǵan. Marat Ahmetjanov pikirinshe, kez kelgen jaǵdaıda azamattardy temir torǵa súıreı berý durys emes.
«Eger tártip buzǵan adam qoǵamǵa zııansyz bolsa, ony tutqynǵa alýdyń qajeti joq. Kepilge qoıý, úı qamaq degen sekildi tásilder bar. Eger kúdikti qylmystyq toptyń múshesi bolmasa, mundaı qadamdy ekonomıkalyq qylmystarǵa qoldanǵan jón. Keı jaǵdaıda tutqynǵa alý arqyly qylmysty moınyna ilip jiberý úshin qysym jasalady. Sondyqtan, ýaqytsha ustaý merzimin 72 saǵattan 48 saǵatqa azaıtqan jón», – dedi Marat Ahmetjanov.
Jıyn barysynda quqyq qorǵaý organdary, sot jáne basqa da memlekettik organdardyń ókilderi quqyq qorǵaý qyzmetin jetildirý jáne qylmystyq prosesti reformalaýdyń negizgi joldaryn talqylady.
Esterińizde bolsa, Memleket basshysynyń tapsyrmasy boıynsha reforma júrgizýdiń joldaryn naqtylaý úshin vedomstvoaralyq jumys toby qurylǵan. Onyń quramyna Joǵary Sottyń, Ádilet mınıstrliginiń, quqyq qorǵaý jáne arnaıy organdardyń birinshi basshylary kirdi.
Spıkerler jańadan usynylǵan quqyq qorǵaý qyzmetin jetildirý jáne qylmystyq prosesti reformalaý jobasy zań ústemdik etetin qoǵam qurýǵa arnalǵan saıasattyń jańa kezeńin kórsetetinin atap ótti. Osy baǵytta atqarylyp jatqan aýqymdy sharalar Memleket basshysynyń tapsyrmasymen qolǵa alynǵan Ult josparyn júzege asyrý sheńberinde júrgizilip keledi.
Jańa jobada qylmystyq prosestegi adam quqyǵyn qorǵaýdy nyǵaıtý, taraptardyń teńdigin arttyrý, sottyq baqylaýdy keńeıtý jáne tergeý organdary, prokýratýra men sot quziretin bólip, bir jumysty eki mekemege júktemeýge baǵyttalǵan.
Marat Ahmetjanovtyń aıtýynsha, Bas Prokýratýra men IIM birlese otyryp, elimizdiń 7 óńirinde pılottyq joba ótkizgen eken. Júrgizilgen jumys nátıjesi boıynsha birqatar usynystar ázirlenip, naqty sharalar qabyldanǵan. Máselen, qylmystyq prosesster sıfrlyq júıege aýystyryla bastaǵan. Osyǵan baılanysty, «elektrondy qylmystyq is» júıesi qurylypty. Jańa júıe qylmystyq isterdiń joǵalyp ketýiniń ne ózgertilýiniń aldyn alady. Sonymen qatar, qylmystyq istiń tez sheshilýine járdemdesip, bıýdjet qarjysyn únemdeıdi. Qazirgi tańda mundaı júıe Jambyl oblysynda engizilgen. Qyrkúıektiń ortasyna deıin taǵy 5 óńirde «e-qylmystyq is» jobasy iske qosylady.
Abaı Asankeldiuly
«Egemen Qazaqstan»
