Osyǵan oraı Ortalyq kommýnıkasııalar qyzmetinde baspasóz máslıhaty ótti. Jıynǵa Senat Apparatynyń basshysy Serik Sydyqov, Syrtqy ister mınıstriniń orynbasary Erjan Ashyqbaev, Pagýosh konferensııasynyń Prezıdenti Djaıanta Danapala jáne atalǵan mekemeniń bas hatshysy Paolo Kotto-Romýsıno qatysty.
Jıynda Pagýosh konferensııasynyń erekshelikteri men tıimdiligi, ıadrolyq qarýdyń qaýpi jónindegi birqatar máseleler talqylandy. Syrtqy ister mınıstriniń orynbasary Erjan Ashyqbaevtyń aıtýynsha, Pagýosh konferensııasynyń Astanada ótýiniń mańyzy orasan.
«Shildede Pagýosh komıteti jasaqtalyp, onyń quramyna bedeldi otandyq ǵalymdar, sarapshylar jáne qoǵam qaıratkerleri kirdi. Búgingi tańda álemde 40 shaqty ulttyq Pagýosh komıteti tirkelgen. Pagýosh qozǵalysynyń Astanadaǵy konferensııada qabyldaıtyn sheshimderi jańa belesterge jetetinine úmit artamyz», – dedi Erjan Ashyqbaev.
Esterińizge sala keteıik, Pagýosh konferensııasy 25 tamyzda bastalady. Is-sharanyń ashylýyna Senat tóraǵasy Qasym-Jomart Toqaev, Pagýosh konferensııasynyń Prezıdenti Djaıanta Danapala, BUU-nyń qarýsyzdaný máseleleri jónindegi Joǵary ókili Isýmı Nakamısý, ıadrolyq synaqtarǵa jappaı tyıym salý týraly sharty Uıymnyń atqarýshy hatshysy Lassına Zerbo qatysady. 5 kúnge sozylatyn konferensııaǵa álemniń 46 elinen 200-den astam delegat keledi.
Abaı Asankeldiuly
«Egemen Qazaqstan»
