Buǵan deıin Astana ákimdiginiń saıtynda elordada baǵasyz kıim-keshek býtıgi jumys istep jatqanyn habarlaǵan bolatyn. Arada apta ótpesten qalada taǵy bir qaıyrymdylyq dúńgirshegi ashyldy.
«Bizdiń áleýmettik aksııany astanalyq kásipkerler qoldap jatyr. Bul óte qýanyshty jaǵdaı. Saryarqa kóshesi, 41 úı meken-jaıynda ornalasqan «Mahabbat» turǵyn úı kesheninde taǵy bir «Qamqorlyq» dúńgirshegi ashyldy», - dedi «Qamqorlyq» áleýmettik aksııasynyń negizin qalaǵan kásipker Erekbolat Qabyldın.
Onyń aıtýynsha, kún saıyn qaıyrymdylyq dúńgirshegine orta eseppen 10-15 adam kelip kıim-keshek pen turmystyq zattardy tapsyrady. Muqtaj adamdar bul dúńgirshekten keregin taýyp otyr.
«Jalpy, bul jetistikke barlyǵy «Rýhanı jańǵyrý» baǵdarlamasynyń arqasynda jetip otyrmyz. О́ıtkeni ol halqymyzda burynnan kele jatqan qaıyrymdylyq pen meıirimdilik syndy qundy qasıetterdi damytyp, bir-birine kómek qolyn sozýǵa úndeıdi», - dedi E.Qabylda.
