Bul shoýdyń álqıssasy sál árirekten bastalady. О́tken jyldyń mamyr aıynda sheteldik basylymdar Meıvezerdiń UFC tarlany MakGregorǵa jekpe-jek ótkizý týraly usynys jasaǵanyn, olardyń 2016 jyldyń jazynda judyryqtasýy múmkin ekenin jazyp jatty. Biraq, buǵan ol kezde eshkim sene qoıǵan joq edi. Kópshilik muny Meıvezerdiń ishi pysqan kezindegi kezekti bir áńgimesi shyǵar degen bolatyn. El arasyndaǵy gý-gý áńgimege UFC prezıdenti Deın Ýaıttyń «MakGregormen kezdesý ótkizgiń kelse, maǵan habarlas», dep Meıvezerge aıtqany otqa maı quıa tústi.
Sóıtip, bir jyldyq sóz qaǵysýdan keıin kásipqoı boks pen aralas jekpe-jektiń qarjylaı «magnattary» 15 maýsym kúni Floıd Meıvezer men ırlandııalyq Konor MakGregordyń 26 tamyz kúni jekpe-jek ótkizýge keliskenderin jarııalady. Bir qyzyǵy, eki sport ókiliniń bir-birimen kezdesýi tarıhta ekinshi ret qaıtalanyp otyr. 1976 jyldyń 26 maýsymynda aty ańyzǵa aınalǵan áıgili boksshy Muhammed Álı men japonııalyq restler jáne karate sportynyń ókili Antonıo Inokı arasynda ótken-di. Tokıoda uıymdastyrylǵan kesh eki sportqa da beıtarap ereje boıynsha uıymdastyrylyp, teń nátıjemen aıaqtalǵan bolatyn. Al biz sóz etip otyrǵan Meıvezer-MakGregor jekpe-jegi boks erejesi boıynsha ótedi. Bylaısha aıtqanda, arystandy sýǵa jiberip, qoltyraýynmen tóbelestirgenmen birdeı bolmaq.
Atalǵan jekpe-jekti álem jankúıerleri taǵatsyzdana kútýde. Tipti, qazaqstandyq kórermenderdiń de bul aıqasty tamashalaýǵa asa nıetti ekenin áleýmettik jeliler men túrli saıttarǵa jazǵan pikirlerinen baıqaýǵa bolady. Al «Ne soısa da qasapshy soısyn» degen ustanymdaǵy sport sarapshylary bul kezdesýdi kórýge yntaly emes. Jáne de jankúıerlerdi Golovkın-Alvares jekpe-jegine barýǵa úgittep jatyr. Olar muny tek bıznes úshin jasalǵan shoý ekenin aıtady. Amerıkalyq tanymal promoýter Lý Dıbella bolsa, bul kezdesýdi boks emes, spektakl dep atady. «Bul boks keshi emes, bul – spektakl. Meıvezer-MakGregor bokstyń shoý ekenin dáleldedi», deıdi. Dese de, kásipqoı bokstyń ózi shoý-bıznes ekenin esten shyǵarmaǵan jón.
Endi atalǵan kezdesý týraly pikir aıtyp jatqan sport sarapshylary men álemge tanymal sportshylardyń boljamdarynan mysal keltire keteıik. Birqatar boks mamandarynyń aıtýy boıynsha, bul aıqasta Floıd Meıvezer qarsylasyn esh qıyndyqsyz jeńetinine kúmán keltirmeıdi. Aýyr salmaqtaǵy álemniń eks-absolıýtti chempıony Lennoks Lıýıstiń pikirinshe, bul kezdesýdi tolyqqandy jekpe-jek dep aıtý qıyn. «Shynymdy aıtsam, muny jekpe-jek dep eseptemeımin. Jankúıerler bul aıqasqa «MakGregor aıaqpen teýip qoımaı ma eken?» degen suraqtyń jaýabyn izdeý úshin baratyn shyǵar», deıdi ol. Al ataǵy jer sharyna taralǵan áıgili promoýter Bob Arým: «O, toba. Bul qandaı boks bolmaq? MakGregordyń bul keshte tıtteı bolsyn jeńiske jetýge múmkindigi joq», dep bul jekpe-jekke tańdanysy men pikirin osylaısha bildirdi.
Úlken Floıd Meıvezer ulynyń jeńiske jetetinine kúmán keltirmeıdi. Sondaı-aq, alpys jasty alqymdaǵanyna qaramastan ol: «Konordy men de jeńe alamyn», dep búkil álemge jar saldy. «Tyńdańyzdar, men 64 jastamyn, ol (MakGregor) – 28 jasta bolsa da, meniń soqqylaryma tótep bere almaıdy. Tipti, kóz ilespes jyldamdyǵymnan meniń soqqym qaıda baǵyttalǵanyn da bilmeı qalady», dep óziniń áli tyń ekenin jankúıerlerge dáleldegendeı boldy. Osy oraıda Gennadıı Golovkınniń bapkeri Abel Sanchestiń pikirin keltire keteıik. «Konorda joǵaltatyn eshteńe joq. Sondyqtan, ol bul aıqasta bar kúshin salý kerek. MakGregordyń bul kezdesýde basty múmkindigi – uzyn qoldaryn paıdalanyp, Floıdqa soqqy jasaýǵa múmkindik bermeý. Ol ár úsh mınýt saıyn tolyq jumys isteýi kerek. Jáne de Meıvezerdiń qatelesýine múmkindik týdyryp, oraıy kelgende anyq soqqylar jasaýy tıis. Sonda ǵana ırlandııalyq boksshy jeńiske jetedi», dep UFC ókiline aqyl-keńes berdi. Al Janat Jaqııanovtyń promoýteri Rıkkı Hatton Konor MakGregordyń nokaýtpen jeńiske jetetinine senedi. «Floıd qazir burynǵy babynda emes. Ol qazir shaý tartyp qaldy. Menińshe, Konor nokaýtpen jeńiske jetedi. Jáne sony qatty tileımin. О́ıtkeni, men MakGregordyń jankúıerimin», dep ırlandııalyq boksshyǵa tilektes ekendigin jetkizdi.
Bul sarapshylar men maman pikiriniń bir parasy ǵana. Sheteldik basylym betterinde kún saıyn birneshe boljamdar men saraptamaly pikirler jarııalanyp jatyr. Olardyń kóbi aldaǵy kezdesýde MakGregordyń jeńiske jetýge esh múmkindigi joq ekenin alǵa tartýda. Biraq, muny tek ár adamnyń pikiri retinde qabyldaǵan durys. О́ıtkeni, ırlandııalyq boksshynyń da bir oılaǵan jospary bar. Onyń ústine, MakGregor amerıkalyq boksshydan 12 jasqa kishi. Jas aıyrmashylyq báribir mańyzdy ról atqaratyny belgili. Sonymen qatar, Konordyń amerıkalyq boksshyǵa qaraǵanda dene bitimi de iri. Degenmen, dál qazirgi sátte eki sportshynyń da jeńiske jetýge degen múmkindigi teń. Kimniń jeńiske jetetinin 27 tamyz kúni biletin bolamyz.
Álı BITО́RE,
«Egemen Qazaqstan»
