«EKSPO-2017» kórmesiniń basty operasııalyq ortalyǵynyń qyzmetkerleri kórmeniń 4 kirý esigin qadaǵalap otyr. Kópshilik baqylap otyrǵan jańalyqty jarty saǵat ýaqyt kútýge týra kelgen. Aqyry bılettiń sońǵy 4 nómiri arqyly kórme qyzmetkerleri 3 mıllıonynshy kelýshiniń kim ekenin anyqtady. Ol kórmeniń Orynbor kóshesi jaǵynda ornalasqan esikten kirdi.
Álemdik dárejedegi halyqaralyq kórmeniń 3 mıllıonynshy kelýshisi bolý baqyty Reseı azamaty Iýrıı Shýrygınge buıyrǵan eken. Meıman Máskeýden «Eýrazııa aptasy» sharasyna arnaıy kelgen.
«Mundaı sáttilikti kútken joqpyn, álbette. Kúni keshe ǵana «EKSPO-2017» halyqaralyq kórmesine kirip, Qazaqstannyń pavılonyn aralaǵan bolatynmyn. Biraq ol joly Reseıdiń pavılonyn tamashalap úlgere almaı kettim. Osy sebepti kórmege qaıta kelgen betim. Men Qazaqstanǵa osymen tórtinshi ret kelip otyrmyn. Maǵan qazaq ulttyq taǵamdary óte unaıdy», - deıdi kórmeniń 3 mıllıonynshy kelýshisi.
Joly bolǵan meımandy EKSPO basshysy Ahmetjan Esimov quttyqtap, kórmeniń sımvoly men planshetti syıǵa tartty.
Eske sala ketsek, halyqaralyq kórmege 2 mıllıonynshy kelýshi 4 tamyzda kelgen bolatyn. Oral qalasynyń Ǵaısa Jumalıev atty kásipkeri kórmeniń 2 mıllıonynshy meımany atanyp, ony «Astana EKSPO-2017» ulttyq kompanııasynyń basqarma tóraǵasy Ahmetjan Esimov quttyqtaǵan edi. Mártebeli meımanǵa planshet, qulaqqap pen kórmege lımıtsiz bılet syıǵa tartylǵan bolatyn.
