Konferensııanyń maqsaty – Qazaqstandy jańǵyrtýdyń ózekti suraqtary boıynsha keń aýqymdy máselelerdi talqylaý.
Konferensııanyń jumysyna 100-den astam adam qatysty. Olardyń arasynda belgili ǵalymdar Z. Sháýkenova, Z. Qabyldınov, B. Ábdiǵalıuly jáne Qazaqstan men sheteldiń sarapshy-taldaýshy qoǵamdastyǵynyń basqa da ókilderi, joǵary oqý oryndarynyń professorlary men oqytýshylary boldy.
Qazaqstan Respýblıkasy Premer-Mınıstri Keńsesi basshysynyń orynbasary Erjan Babaqumarov konferensııa qatysýshylaryna óziniń quttyqtaý sózin arnap, onda Nursultan Nazarbaevtyń qoǵamda rezonans týǵyzyp, qalyń kópshilik arasynda qoldaý tapqan «Bolashaqqa baǵdar: rýhanı jańǵyrý» atty baǵdarlamalyq maqalasy óziniń iske asyrylýy jóninen erekshe tásildi talap etetin jalpyulttyq aýqymdaǵy tereń maǵynaly qujat bolyp tabylady dep atap ótti.
– Táýelsiz Qazaqstan tarıhynda áli eshqashan ult aldynda sanany jańǵyrtý sekildi asa tereń ári aýqymdy mindet turmaǵan edi. «Rýhanı jańǵyrý» – memlekettiń barlyq salalarynyń sapalyq turǵydan jańaryp-ózgerýine negiz bolýǵa tıis ıdeıalyq tuǵyrnama. Búgingi tańda jańarýǵa degen talpynys óziniń máni jóninen ulttyq-memlekettik ózin-ózi saqtaýmen jáne sapaly damýmen birdeı bolyp otyr – dep atap ótti, E. Babaqumarov.
Konferensııanyń moderatory Eýrazııalyq ıntegrasııa ınstıtýtynyń dırektory Ǵanı Nyǵymetov óz sózinde ınstıtýt júrgizip jatqan sosıologııalyq zertteýlerdiń aldyn ala qorytyndysyn aıtyp berdi.
– Zertteýlerge kóz júgirter bolsaq, qazirgi tańda Úshinshi jańǵyrý aıasyndaǵy sharalardy iske asyrý úshin qolaıly jaǵdaı qalyptasyp otyr. Qoǵamdyq pikirde reformashyl kóńil-kúıdiń joǵary ekeni atap ótilýde. Qazaqstandyqtardyń 82%-ǵa jýyǵy el ómirinde ózgeris qajet dep esepteıdi. Bul rette qazirgi áleýmettik-saıası damý baǵytyn qoldaý deńgeıi de meılinshe joǵary – 88%.
Sosıologııalyq zertteýlerdiń derekteri qazaqstandyq qoǵam damýynyń áleýmettik-mádenı aspektilerin qozǵaıtyn jańǵyrý mindetteri men konstıtýsııalyq ózgerister qazaqstandyqtar arasynda qoldaý taýyp otyrǵanyn kórsetedi, – dep atap ótti Ǵ. Nyǵymetov.
Konferensııanyń jumysy barysynda jaýapty memlekettik qurylymdar men ǵylymı-sarapshylyq jurtshylyq ókilderi arasynda «Rýhanı jańǵyrý» baǵdarlamasy men Konstıtýsııalyq reformanyń sheshýshi baǵyttaryn iske asyrý barysyn talqylaý boıynsha keń kólemde syndarly suhbat órbidi.
Kezdesýge qatysýshylar qoǵamdyq sanany jańǵyrtý baǵdarlamasy sheńberinde júrgizilip jatqan jumysty keńinen jazyp-kórsetip, halyqqa túsindirý úshin suhbat alańy jumysynyń mańyzy zor ekenin atap ótti.
