Keńeske Premer-Mınıstr B.Saǵyntaev, Májilis tóraǵasy N.Nyǵmatýlın, Prezıdent Ákimshiliginiń Basshysy Á.Jaqsybekov, Úkimet músheleri, ortalyq memlekettik organdar men ulttyq kompanııalar jetekshileri qatysty.
Keńes barysynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Q.Qojamjarov, Prezıdent Ákimshiligi Basshysynyń orynbasary T.Donaqov, Ulttyq ekonomıka mınıstri T.Súleımenov, Prezıdent Ákimshiligi Basshysynyń birinshi orynbasary M.Tájın, Senat tóraǵasynyń orynbasary B.Beknazarov baıandama jasady.
Memleket basshysy jumys toby jetekshileriniń esepterin tyńdap, Bes ınstıtýsıonaldyq reformanyń jekelegen baǵyttarynyń iske asyrylý barysyna toqtaldy.
– Birinshi reformaǵa toqtalaıyq. «B» korpýsynyń basshylyqtaǵy qyzmetkerlerin attestasııalaý qorytyndysynda kóptegen mınıstrlik pen ákimdikterde jumys isteıtinderdiń strategııalyq jáne baǵdarlamalyq qujattardy bilý deńgeıi tómen ekeni anyqtaldy. Eń aldymen, bul aýyl sharýashylyǵy, densaýlyq saqtaý, bilim jáne ǵylym mınıstrlikterine, sondaı-aq barlyq ákimdikterge qatysty bolyp otyr. Memlekettik qyzmetkerlerdiń qyzmet babynda ósý jaǵdaıy jaqsardy. Sonymen birge, birqatar memlekettik organdarda «komandalyq aýys-túıiske» baılanysty basshylyq quramnyń aýysý deńgeıi joǵary ekeni baıqalady, – dedi Elbasy.
Nursultan Nazarbaev «óz erkimen» bosaǵan laýazymdarǵa túrli kezeńde basshylarmen birge jumys istegen adamdar taǵaıyndalyp jatqanyn aıtty, sondaı-aq bul máselelerdi retke keltirý jóninde qosymsha sharalar qabyldaýdy tapsyrdy.
– Zańdylyq pen quqyqtyq tártiptiń buzylýy týraly halyqtyń Prezıdent Ákimshiligine aryz-shaǵymy azaımaı tur. Sotqa deıingi satyda naqty jaryspalylyq joq. Qorǵaýshylar men quqyq qorǵaý organdary qyzmetkerleriniń biliktiligi jetkiliksiz. Aıqyn ári bolmashy buzýshylyqtar jónindegi rásimderdi meılinshe jeńildetý qajet. Adamdar qarapaıym ister boıynsha sheshimdi aılap kútpeýi kerek. Sot jáne quqyq qorǵaý organdarynyń sheshimderi jınaqy ári adamdarǵa túsinikti bolýǵa tıis, – dedi Qazaqstan Prezıdenti.
Sondaı-aq, Memleket basshysy jergilikti polısııa qyzmetine toqtalyp, shuǵyl jaǵdaılarda olardy basqarýdyń jáne áreket etý jedeldiginiń tómendemeýine jol bermeý qajettigine toqtaldy.
– Jergilikti polısııa ishki ister organdarynyń birtutas júıesinde bolǵan jáne solaı bolyp qala beredi. Alaıda, ákim polısııa aldyna jergilikti mańyzy bar quqyqtyq tártipti qamtamasyz etý jáne quqyq buzýshylyqtyń aldyn alý jóninde mindetter qoıýǵa quqyly, – dedi Elbasy.
Nursultan Nazarbaev Bes ınstıtýsıonaldyq reformanyń úshinshi baǵytyna qatysty 50 qadamnyń 13-i iske asyrylǵanyn, al qalǵany boıynsha jumystardyń júrgizilip jatqanyn atap ótti.
Sonymen birge, Qazaqstan Prezıdenti jańa Salyq kodeksi jobasynan tıimsiz jeńildikter men artyqshylyqtardy alyp tastaý qajettigin taǵy da eskertip, bul másele jóninde aýqymdy túsindirý jumystaryn júrgizýdi tapsyrdy.
Budan bólek, Memleket basshysy óńirlik elektr júıeleri kompanııalaryn irilendirý jónindegi zańdy oryndaýdyń mańyzdy ekenine nazar aýdardy. Onyń nátıjesinde tutynýshylar úshin elektr energııasynyń baǵasy tómendeýge tıis.
– Eksporttyq taýarlar jasaý jáne álemdik naryqqa shyǵý úshin qaıta óńdeý sektoryna keminde 10 transulttyq kompanııany tartý mindeti qoıylǵan bolatyn. Byltyr «Tenarıs», «EFKO» jáne «Koka-kola» kompanııalary iske asyrǵan 3 birlesken joba ǵana iske qosyldy. Bul rette, koka-kola shyǵaratyn kompanııa elimizde ótken ǵasyrdan bastap jumys isteýde, – dedi Elbasy.
Nursultan Nazarbaev «iri ınvestorlardyń» qatysýymen ekonomıkanyń basym sektorlaryndaǵy jobalardy iske asyrý turǵysynan sońǵy 2 jylda aıtarlyqtaı ilgerileýshilik bolmaǵanyn aıtty.
– Bul jóninde jyl saıyn aıtyp kelemiz. Áli kúnge deıin strategııalyq ınvestormen birge osy salada birde-bir joba iske asyrylǵan joq. Arnaıy «Kazakh Invest» ulttyq kompanııasyn qurdyq. Oǵan aıryqsha mártebe berip, barlyq óńirde ókildikterin ashtyq. Jarty jyl ótti, nátıjesi qaıda? – dedi Qazaqstan Prezıdenti. Sondaı-aq, Premer-Mınıstrge ınvestorlar tartý jónindegi jumystarǵa jaýapkershilik belgileý júkteldi.
Sonymen qatar, Qazaqstan Prezıdenti «Astana» halyqaralyq qarjy ortalyǵy men onyń ınstıtýttarynyń budan arǵy jumys jospary men perspektıvalaryna toqtaldy.
Memleket basshysy Úkimet qabyldaǵan sharalarǵa qaramastan, jer qoınaýyn paıdalaný sektorynda oryn alyp otyrǵan sybaılas jemqorlyq máselelerine toqtalyp, bul saladaǵy zańnamany qaıta qarastyrýdy tapsyrdy.
Sońynda Nursultan Nazarbaev Ult josparyn odan ári iske asyrý úshin bıliktiń barlyq tarmaǵynyń aldynda turǵan aýqymdy jumys kólemin aıqyndap berdi.
– Konstıtýsııalyq reforma aıasynda Úkimettiń Parlament pen onyń palatalary aldyndaǵy eseptiligi men baqylanýy kúsheıtildi. Kez kelgen basshy jaýapkershilikti basqaǵa aýdarmaı, máseleni óz deńgeıinde jedel ári biliktilikpen sheshýge tıis. Aǵymdaǵy máselelerdi Prezıdenttiń deńgeıine shyǵarýdyń qajeti joq, – dedi Elbasy.
