Jańa oqý jylynyń bastalýyna da sanaýly kúnder qaldy. Al Jambyl oblysynda jańa oqý jylyna ázirlik barysy qandaı deńgeıde? Búgin Taraz qalasyndaǵy «ARAI PLAZA» bıznes ortalyǵynda «Qazaqstannyń jańǵyrýy 3.0 – bilimniń úlesi» atty oblystyń pedagogıkalyq qyzmetkerleriniń Tamyz konferensııasy ótti. Oǵan óńirdegi barlyq bilim oshaǵynyń basshylary men muǵalimder qatysty.
– Biz birinshi qyrkúıekte 1700 oqýshyǵa arnalǵan 4 mektepti paıdalanýǵa beremiz. Jyl sońyna deıin taǵy bir mektep ashylady. Bıyl 9 mekteptiń qurylysyn bastadyq. Onyń ishinde «Nurly Jol» baǵdarlamasy aıasynda, Ulttyq qor qarajaty esebinen 2 mektep salynýda. Osylaısha oblystaǵy 7 apatty, 4 úsh aýysymdy mekteptiń máselesi tolyǵymen sheshiledi. Qalǵan 2 apatty jáne 1 úsh aýysymdy mekteptiń máselesi 2018 jyly sheshilmek. Munyń barlyǵy da bizdiń bolashaǵymyz úshin jasalǵan eń mańyzdy ınvestısııa. Memlekettiń jas urpaqtyń bilimi men tárbıesine degen erekshe qamqorlyǵy – dedi Jambyl oblysynyń ákimi Kárim Kókirekbaev.
Alaıda, shaǵyn jınaqty mektepterdiń jaǵdaıy da bilim berý salasyndaǵy ózekti máselelerdiń biri. Oblystaǵy mektepterdiń 31 paıyzy, ıaǵnı 140 mektep shaǵyn jınaqty mektepter. О́z sózinde ákim mundaı mektepterde arnaıy pándik kabınetterdiń jetkiliksiz ekenin, oqýshy sany az bolǵandyqtan, bir oqý kabınetinde eki, úsh synyptyń balalary toptasyp oqıtyn bastaýysh mektepterdiń de bar ekenin aıtyp ótti. Olarda jańartylǵan mazmunda bilim berýdi tolyǵymen iske asyrý múmkin emestigine de toqtaldy.
Búginde oblysta balabaqsha kezeginde 33 myńnan astam bala tur. Bul ásirese Taraz qalasy men Baızaq, Qordaı, Merki jáne T.Rysqulov aýdandarynda baıqalady. Sońǵy jeti jylda jekemenshik balabaqshalar sany 78-ge jetse, jyl sońyna deıin taǵy 955 oryndyq 16 jekemenshik balabaqsha ashylatyn bolady. Sondaı-aq, Tamyz keńesinde barlyq aýdandar jekemenshik balabaqshalarǵa memlekettik tapsyrysty arttyrý qajettigi de sóz boldy. Alaıda, Moıynqum jáne Talas aýdandarynda memlekettik-jekemenshik seriktestik aıasynda birde-bir mektepke deıingi mekeme ashylmaǵan. Sonymen qatar, Baızaq, Qordaı, Shý aýdandary men Taraz qalasyndaǵy mektepterde oqýshy oryndarynyń jetispeýshiligi bar bolyp otyr.
Hamıt ESAMAN,
«Egemen Qazaqstan»
