Oblys ákimdiginiń foıesinde oblys ekonomıkasynyń basym baǵyttary men Taldyqorǵan qalasyn damytýdyń Bas jospary kórsetilgen stendter ornatyldy.
Resmı delegasııaǵa oblys aýmaǵynda júzege asyrylyp jatqan agro-ónerkásiptik keshendi damytý, ındýstrııalandyrý, ınvestısııa tartýdyń negizgi kórsetkishteri jáne óńirdi damytý baǵdarlamasynyń oryndalý barysy tanystyryldy. Kezdesýdi oblys ákimi Amandyq Batalov ashty. Resmı delegasııany tanystyrǵannan keıin, óńir basshysy Almaty oblysyna kelý týraly usynysyn qabyl alǵany úshin Tatarstan Respýblıkasynyń prezıdenti Rýstam Mınnıhanovqa alǵysyn bildirdi.
«Bizben yntymaqtastyq qurý týraly bildirgen nıetimizdi qabyl alǵandaryńyz bizdi qatty qýantady. Biz Sizderden ónerkásipti damytý, jańa tehnologııalardy engizý turǵysyndaǵy tájirıbelerińizdi ózimizde qoldanǵymyz keledi. Qant qyzylshasyn ósirýdi jańǵyrtý – Jetisý ólkesi úshin basym baǵyttardyń biri bolǵandyqtan, osy baǵytta biz jumyla jumys júrgizýdemiz. Sol sebepti sizderdiń osy baǵyttaǵy tájirıbelerińiz ben tehnologııalaryńyz bizdi qyzyqtyratyndyǵy anyq. Sondaı-aq, Memleket basshysy Nursultan Ábishuly Nazarbaevtyń tapsyrmasymen qurylǵan «Qorǵas – Shyǵys qaqpasy» arnaıy ekonomıkalyq aımaǵy (AEA) men «Qorǵas» shekara mańy yntymaqtastyǵynyń Halyqaralyq ortalyǵy (ShYHO) arqyly «Qurǵaq port» transulttyq jobasynyń múmkinshilikterine negizdelip, Tatarstan men Almaty oblysynyń kásipkerleri arasynda áriptestiktiń tyǵyz baılanysyn ornatqymyz keledi. Taǵy bir atap ótýge turarlyq másele – bizdiń óńirimizde barlyq qajetti ınfraqurylymy júrgizilgen ındýstrıaldy aımaqtar bar. Bul da bıznesti damytý men ınvestısııa tartýǵa septigin tıgizer ıgi isimiz», - dedi A. Batalov.
Osydan keıin sóz alǵan Tatarstan Respýblıkasynyń prezıdenti Rýstam Mınnıhanov Almaty oblysyna shaqyrǵany úshin Amandyq Ǵabbasulyna alǵysyn bildirip, eki jaqty tıimdi áriptestik qurý máselelerine toqtaldy. «Biz «Qorǵas» ShYHO men «Qorǵas – Shyǵys qaqpasy» AEA nysandarynyń múmkindikterimen tanysýǵa úlken qyzyǵýshylyq tanytýdamyz. Biz úshin erkin ekonomıkalyq aımaqtyń jumysymen tanysý, qandaı baǵyttar boıynsha birlesip jumystar júrgizýge bolatyndyǵyn anyqtaý, otandyq ónimderimizdi Qazaqstan aýmaǵy arqyly ózge memleketterge ótkizý múmkindikterin qarastyrý mańyzdy bolyp tur. Almaty oblysynda memlekettik-jekemenshik áriptestik negizinde kóptegen balabaqshanyń ashylyp jatqandyǵyn erekshe atap ótkim keledi. Bul tájirıbelerińiz bizderdi qyzyqtyrdy. Odan bólek, Jetisý óńiri maıburshaq pen júgeri óndirý boıynsha aldyńǵy qatarda ekendigin eskersek, biz úshin osy ónimderdi ósirýdegi sizderdiń tájirıbelerińiz qajet. Jalpy Tatarstan men Almaty oblysy arasynda aýylsharýashylyǵy baǵytynda joldary qıylysar tustardyń óte kóp ekendigin jáne ony qos tarapqa da tıimdi paıdalanýǵa bolatyndyǵyn baıqadym. Jetisýdyń ásem tabıǵatyn aıtpaı ketpeske bolmas. Sizderdiń tabıǵı-klımattyq jaǵdaılaryńyz básekelesterińizdiń aldynda sizderge basymdyq beretini sózsiz», - dep atap ótti Rýstam Mınnıhanov.
О́zara tıimdi yntymaqtastyq múmkindikterin talqylaǵannan keıin, qos tarap kezdesýdi Til saraıynda jalǵastyrdy. Onda Tatarstan prezıdenti Almaty oblysynyń tatar etnomádenı ortalyǵynyń ókilderimen kezdesti. Kezdesýdiń erekshe sáti dep Tatarstan prezıdentiniń oblys ákimi Amandyq Batalovqa Árip Táńirbergenniń «Birjan Sal men Aqyn Sara aıtysy» atty qoljazbasynyń kóshirmesin tabystaýyn atap ótýge bolady. Osylaısha qazaqstandyq tatar qaýymdastyǵynyń erterekte aıtylǵan amanaty oryndaldy.
