Qyrǵyzstannan, Tatarstan men Bashqurtstan Respýblıkalarynan kelgen jáne qazaqstandyq birneshe top óner kórsetken saıys joǵary deńgeıde ótti. Buryn «Jaıdarmannyń» ishki birinshiligine qatysyp, tájirıbe jınaǵan qyrǵyzstandyq jaıdarmanshy jastar oıynǵa tyńǵylyqty daıyndyqpen kelip, bas júldemen qosa 500 000 teńge aqshalaı syılyqty ıemdendi. I oryn men 350 000 teńgeni qazylar alqasy biraýyzdan Tatarstan quramasyna berse, II oryn alǵan Bashqurtstannan kelgen komandaǵa 300 000 teńge aqshalaı syılyq buıyrdy. Al III oryn men 150 000 teńge eki komandaǵa – Torǵaı óńiriniń namysyn qorǵap kelgen «Arý.kz» toby men Ońtústik Qazaqstan oblysynyń quramasyna berildi.
Sondaı-aq, Halyqaralyq Túrki akademııasy jarkenttik uıǵyr jastarynan quralǵan «Lagman.com» toby men túrkistandyq ózbek aǵaıyndardyń quramasy – «Iаssy» tobyna 250 000 teńge arnaıy aqshalaı syılyq usyndy.
«Jaıdarman» arqyly qazaq tiliniń sánge aınalýyna zor úles qosyp jatyrmyz. Maqsatymyz – osy oıyndardy halyqaralyq deńgeıge jetkizý. Búgingi oıyn osy maqsattyń alǵysharty dep oılaımyz», – dedi «Jaıdarmannyń» júrgizýshisi, Qazaqstan KVN odaǵynyń tóraǵasy Esen Eleýken.
Tól rýhanı jobanyń halyqaralyq deńgeıge shyqqanyna jınalǵan jurtshylyq shynaıy yqylas tanytty. Ony kórermen kópshiliktiń dý qol shapalaqtap, sharanyń sońyna deıin qolpashtap otyrǵanynan da baıqaýǵa bolady. Buǵan qosa, «Jaıdarman» túrkitildes elderdiń jastarynyń ózara yntymaqtastyǵy men rýhanı-mádenı baılanystaryna keń óris ashty. Aldaǵy ýaqytta oıyndy «Qazaqstan» ulttyq arnasynan kórsetý josparlanyp otyr.
Álı BITО́RE,
«Egemen Qazaqstan»
