Sonymen birge, bıyl maýsym aıynan bastap Ortalyq Azııada, tipti TMD memleketteriniń ishinde tuńǵysh ret táýelsiz elimizdiń elordasynda EKSPO-2017 halyqaralyq mamandandyrylǵan kórmesi ótip jatyr. Mine, osyndaı álemdik sharalarǵa qatysý úshin tórtkúl dúnıeniń tórt buryshynan kelgen qonaqtarǵa ajarly Astanany, búkil táýelsiz Qazaqstandy alǵash tanystyratyn Astana halyqaralyq áýejaıy men temir jol vokzaly ekendigi daýsyz. Qaı eldiń, qaı qalanyń bolmasyn bolmysyn kórsetetin alǵashqy qaqpa áýejaı jáne temir jol beketteri bolyp tabylady. Osy rette jaqynda ǵana boı kótergen astanalyq «Nurly jol» temir jol vokzal kesheniniń alar orny erekshe.
Ústimizdegi jyldyń mamyr aıynda ǵana paıdalanýǵa berilgen bul zamanaýı jolaýshylar beketi kúni keshe alǵashqy mıllıonynshy jolaýshyny qabyldap úlgerdi. «Bul burynǵy Keńes elderi arasyndaǵy osyndaı jalǵyz vokzal, men tipti Eýropada mundaıdy kórgen joqpyn. Ol bolashaqqa arnalyp salynǵan. Qazaqstannyń barlyq óńirin «Talgo» júrdek poıyzymen baılanystyrdyq, olar saǵatyna 150-200 shaqyrym jyldamdyqpen júre alady. Buryn Almatydan 24 saǵatta jetetin bolsaq, qazir 11 saǵat jetkilikti», dep atap kórsetken edi Memleket basshysy jańa vokzaldyń ashylý saltanatynda.
Sáni men saltanaty jarasqan arý Astananyń tamasha arhıtektýralyq sáýletine «Nurly jol» vokzal kesheni jarasymdy úılesim tapqan. Vokzal ǵımaratynyń jalpy aýmaǵy 126 myń sharshy metrdi alyp jatyr. «Nurly jol» vokzaly táýligine 35 myń jolaýshyny ótkizýge qabiletti. Ýaqyt talabyna toqtam bar ma. 1990 jyly Selınograd qalasynyń temir jol vokzalynyń eski ǵımaratynyń janynan 9 qabatty jolaýshylar termınaly salynǵanda, óńirde budan ótken jolaýshylar beketi bolmaǵandaı kórinýshi edi. Odan keıin elorda halqynyń kúrt ósýine baılanysty 2003 jyly bul vokzal túbegeıli qaıta qurylyp, táýligine 12 myń jolaýshy ótkizýge laıyqtalǵan bolatyn. Endi mine, jańa vokzal termınaly 35 myń jolaýshyǵa joǵary deńgeıde qyzmet kórsetedi.
«Nurly jol» vokzal termınalyna jolaýshylardy qabyldap-jóneltetin 6 temir jol toraby túıistirilgen. Vokzal jolaýshylar tasqynyna sapaly qyzmet kórsetetin zamanaýı ýltraqondyrǵylarmen jabdyqtalǵan. Jolaýshylarǵa bılet satýdyń elektrondy júıesi jumys isteıdi. Munda múmkindigi shekteýli jandarǵa arnalǵan takıldik joldar, Braıl álipbıimen jumys isteıtin aqparattyq tablo, arnaıy kassa qyzmet kórsetedi. Negizgi kútý zaldarynan basqa álemdik joǵary talaptarǵa saı qonaqúı bólmeleri, júk saqtaý qoımalary, ana men bala bólmesi, medısınalyq ortalyq, meıramhanalar, 1500 oryndyq ishki jáne syrtqy parkıngter jumys isteıdi. Jańa vokzal ǵımaraty Astanada ótip jatqan jahandyq EKSPO-2017 kórmesiniń bas taqyryby – «Bolashaqtyń energııasyna» sáıkes ishnara «jasyl» tehnologııa talaptarymen jumys isteýge beıimdelgen. Ǵımarattaǵy lıftiler men eskalatorlar qýat únemdeý tásiline baǵyndyrylǵan. Máselen, vokzaldaǵy eskalatorlar jolaýshylar tasqynynyń kóptigi men azdyǵyna baılanysty qozǵalysyn rettep, qýat únemdep otyrady. Taǵy bir erekshelik, vokzal ǵımaratynyń 42 myń sharshy metr aýmaqty alyp jatqan tóbesinde jańbyr jáne qar sýyn jınaý tehnologııasy oılastyrylǵan. Osy ádispen jınalǵan sýdy vokzal aımaǵyndaǵy gúlzarlardy sýarýǵa jáne basqa tehnıkalyq maqsattarǵa paıdalanady.
Vokzal ǵımaratynyń ishindegi jáne syrtyndaǵy qozǵalys udaıy baqylaýda. Jalpy, jańa vokzal kesheninde jolaýshylardyń qaýipsizdigine barynsha joǵary dárejede jaǵdaı jasalǵan. Munda jolaýshylardy tekserip kirgizý qurylǵysy, beınebaqylaý júıesi ornatylǵan. Jańa vokzal keshenindegi jolaýshylarǵa sapaly deńgeıde qaltqysyz qyzmet kórsetý mindeti arnaıy daıyndyqtan ótken bilikti 1300 qyzmetkerge júktelgen.
«Men otbasymmen Taraz qalasynan Astanada ótip jatqan EKSPO-2017 kórmesin tamashalaý úshin saparlap keldim. «Nurly jol» vokzalyna túsken sátten bastap, biz álemdik talaptarǵa saı joǵary sapaly qyzmet kórsetý úlgisine tánti boldyq. Alǵashqyda osynshama aýmaqty alyp jatqan ǵımarat ishinde adasarmyz dep oılap edim. Joq. Elgezek te kishpeıil qyzmetkerler qalaı júrýdi, qaıda barýdy túsindirip, jolbasshylyq jasady. О́z elimde jolaýshylarǵa qyzmet kórsetýdiń halyqaralyq standarttaryna saı osyndaı vokzal termınalynyń baryna kýá bolyp, maqtanysh sezimge bólendim», deıdi Aıman Asylbekova atty ana aǵynan jarylyp. Qarapaıym kóńilden shyqqan osy bir shynaıy pikirge alyp-qosarymyz joq.
Jylqybaı Jaǵyparuly,
"Egemen Qazaqstan"
Sýretti túsirgen Erlan Omar,
"Egemen Qazaqstan"
